Statsbudsjettet 2025
Styrkjer Nordkalottens grenseteneste i Skibotn
Pressemelding | Dato: 07.10.2024 | Kommunal- og distriktsdepartementet
Regjeringen styrkjer arbeidet til Nordkalottens grenseteneste i Skibotn med 2,5 millionar kroner i forslaget til statsbudsjett. Tenesta har som mål å leggje til rette for grenseoverskridande aktivitetar for personar, verksemder, organisasjonar og myndigheiter i Noreg, Sverige og Finland
– Grensehinder mellom landa i Norden må byggast ned. God mobilitet av folk er viktig for å auke tilgangen på arbeidskraft og sysselsetting. Dette er særleg viktig i Nord-Noreg seier kommunal- og distriktsminister Erling Sande (Sp).
Pengane skal gå til Nordkalottens grenseteneste i Skibotn i Storfjord kommune. Grensetenesta arbeider aktivt for auka mobilitet på tvers av landegrensene i Finland, Sverige og Noreg.
Grensetenesta skal ha ei god samla oversikt på tvers av ulike etatar, og skal raskt og effektivt kunne rådgje og henvise brukarar til rett instans. Informasjonen blir gitt på svensk, finsk, norsk og samiske språk.
Kommunal- og distriktsdepartementet sin pressetelefon: 22 24 25 00
E-post til kommunikasjonseininga: ke@kdd.dep.no