Styrkjer tiltak i nord

– Regjeringa ser alvorleg på situasjonen som mange lokalsamfunn i Finnmark står i. Vi har difor eit særskilt fokus på tiltak som kan kome til nytte lokalt og som legg grunnlag for vidare utvikling, seier kommunal- og distriktsminister Erling Sande (Sp).

Regjeringa foreslår mellom anna å løyve 17 millionar kroner til kommunale næringsfond til kommunar i Finnmark med stor fiskeriverksemd. Pengane kan nyttast av kommunane til å støtte næringslivet lokalt med tilskot til investeringar, prosjekt og gründarar. Regjeringa vil òg nytte midlar gjennom ordninga Arktis 2030 til å utvikle sjømatindustrien i regionen, gjennom støtte til innovasjons- og utviklingsprosjekt i fiskerinæringa.

– Fleire kommunar i Finnmark vil ha behov for langsiktig utviklingsarbeid. Vi foreslår difor òg å løyve ekstra midlar til nye omstillingsprogram i kommunar med særleg stor nedgang i sysselsetting og folketal, seier Sande.

I tillegg foreslår regjeringa 17 millionar kroner til eit nytt tilskot til etablering og tilpassing av bustader i kommunar i Finnmark med bygdevekstavtale. Dette omfattar Berlevåg, Båtsfjord, Nesseby, Tana, Nordkapp, Porsanger, Lebesby, Gamvik, Hammerfest, Hasvik og Måsøy. Ordninga skal forvaltast av Husbanken, og bidra til å stimulere til auka bustadetablering i lite fungerande bustadmarknader i distriktsområde. Dette er område som er prega av ein einsidig og eldre bustadmasse, låg omsetning og lite nybygging.

 

Kommunal- og distriktsdepartementet sin pressetelefon: 22 24 25 00
E-post til kommunikasjonseininga: ke@kdd.dep.no