Tilsette i fem bransjar får gratis etter- og vidareutdanning neste år

I 2025 er det derfor totalt fem aktive bransjeprogram som skal bidra til kompetanseutvikling i utvalde bransjar.

—  Mangelen på kompetent arbeidskraft kan ikkje berre løysast ved å utdanne fleire – kompetansepåfyll til dei som allereie er i jobb er minst like viktig. Gjennom bransjeprogramma får folk i jobb tilbod om fleksibel etter- og vidareutdanning i heile Noreg, og får oppdatert kompetanse tilpassa eit raskt skiftande arbeidsliv. Det er viktig både for den enkelte og for å omstille industrien og helse- og omsorgssektoren, seier forskings- og høgare utdanningsminister Oddmund Hoel (Sp).

Kva er eit bransjeprogram?

Bransjeprogram er ei tilskotsordning der staten og partane i arbeidslivet samarbeider om å auke deltakinga i kompetanseutvikling innanfor utvalde bransjar. Gjennom bransjeprogramma kan tilsette, permitterte og arbeidsledige få gratis kurs og utdanning. Målet er å sikre kompetanseutvikling i tråd med behovet i bransjane, slik at tilsette kan takle omstillingar og vere betre rusta for morgondagens arbeidsliv. Opplæringstilboda skal kunne gjennomførast i kombinasjon med jobb.

Samarbeidet med partane er svært viktig

Partane i arbeidslivet har ansvar for å definere kompetansebehovet i bransjen, og vurdere det faglege innhaldet i opplæringstilboda. I år var det 14 bransjar som blei nominert av partane.

NHO er ein viktig aktør i samarbeidet om nye bransjeprogram, og dei støttar regjeringa sitt forslag.

—  Det er bra regjeringa etablerer nye bransjeprogram. Det er behov for meir kompetanse, det understrekar talet på nominasjonar til bransjeprogram i år. Derfor har NHO vore tydelege på at talet på bransjeprogram må opp, seier administrerande direktør i NHO, Ole Erik Almlid.

LO har vore ein aktiv pådrivar for dei to nye bransjeprogramma som no skal etablerast.

—  Eg er glad for at regjeringa foreslår to nye bransjeprogram innanfor helse- og omsorgssektoren og innanfor solkraftbransjen. Det er Fagforbundet og El- og IT-Forbundet som har vore med på å søke om etablering av desse to bransjeprogramma, og det er eit stort behov for kompetansepåfyll innanfor desse to bransjane. LO vil jobbe vidare for å etablere fleire slike bransjeprogram, for det er ingen tvil om at arbeidstakarar i fleire bransjar vil nyte godt av slike trepartsvise bransjeprogram, seier LO-sekretær Trude Tinnlund.

Meir om bransjeprogram

Kvart bransjeprogram får tilskot i tre år. Tilbydarar av opplæring kan søke om tilskot, men må dokumentere samarbeid med arbeidslivet. Det er Direktoratet for høgare utdanning og kompetanse (HK-dir) som forvaltar ordninga. Regjeringa har foreslått å styrke tilskotsordninga med 15 millionar kroner i statsbudsjettet for 2025, som eit resultat av frontfagsoppgjeret 2024.