Tømmerhogsten auka mest i kystfylka i 2024
Nyheit | Dato: 29.01.2025 | Landbruks- og matdepartementet
Skogbruket selde om lag 12 millionar kubikkmeter tømmer til industriføremål i 2024. Dei to siste åra har auken vore størst langs kysten, med Trøndelag og Vestland på topp.
Dei 12 millionane kubikkmeter tømmer som gjekk til industriføremål i 2024, er den høgaste målte avverkinga i Noreg og er 336 000 kubikkmeter meir enn førre rekordår, 2022.
Fylka på Austlandet stod for 75 prosent av den norske avverkinga. Men den største auken har funne stad langs kysten. Det er det fleire årsaker til. Pris, driftsforhold, tilgang på driftskapasitet og auka moglegheiter for båttransport mellom anna gjennom nye tømmerkaier kan vera nokre av dei.
- Les meir om tømmerhogsten 2024 på nettstaden til Landbruksdirektoratet Tømmerhogsten i 2024 økte mest i kystfylkene - Landbruksdirektoratet
60 prosent av auken i hogsten frå 2022 til 2024 består av furu. For furu og lauv er det potensial for å auka hogst. For lauvtreslaga auka hogsten med 20 prosent, og sameleis var det for granhogsten. 46 prosent av den totale avverkingsauken frå 2022 til 2024 er massevyrke av furu. Det blir eksportert mest massevyrke av furu til Sverige, ifølgje tal frå SSB.