Vann for sine bidrag til eit sunnare kosthald

Grilstad vann i kategorien Sunnare produkt med serien Lev Litt Lettere.

– Det er eit gode at vi som forbrukarar har moglegheit til å velje sunnare produkt når vi ønsker det. Det har ei betydning for folkehelsa, seier helse- og omsorgsminister Ingvild Kjerkol.

Ei merking som hjelp forbrukaren

I kategorien Sunnare marknadsføring vann Baker- og Konditorbransjens Landsforening med merkeordninga Brødskalaen.

– Denne merkeordninga er ei enkel, grafisk framstilling av kor grovt brødet er, og er eit godt eksempel på merking som kan hjelpe forbrukarane å finne sunnare alternativ, seier Kjerkol.

Gode val til lågare pris

Andre- og tredjeplassen i kategorien Sunnare produkt gjekk til ISS med matfilosofien Good Mood Food og Unil med sine First Price-produkt med grunngjeving i at dei gir ernæringsmessige gode val til ein lågare pris.

I kategorien Sunnare marknadsføring fekk Rema 1000 andreplassen for deira støtte til aktiv idrett med frukt og grønt på idrettsarrangement, mens tredjeplassen gjekk til Opplysningskontoret for frukt og grønt (OFG) med 5 om dagen barnehage.

Helse- og omsorgsdepartementet sine utmerkingar skal fremje arbeidet med å legge til rette for eit sunnare kosthald.

Knytt til intensjonsavtalen

Aktørane som kjempar om utmerkingar er alle knytt til intensjonsavtalen. Dette er ein samarbeidsavtale mellom helsemyndigheitene og matbransjen for å betre kosthaldet i befolkninga. Avtalen gjeld fram til og med 31. desember 2025.

Vinnarane blei kåra på UMAMI Lillestrøm torsdag i samband med seminaret Spisevaner endres raskt i krisetider – mulighetsrom for det vi skal spise #MerAv.

Arrangørar var Norges Frukt- og Grønnsaksgrossisters Forbund, Sjømat Norge, Baker- og Konditorbransjens Landsforening og Opplysningskontoret for frukt og grønt.