Vil ha mål om å utrydde villsvinbestanden i Noreg
Nyheit | Dato: 21.09.2023 | Landbruks- og matdepartementet
Landbruks- og matminister Geir Pollestad (Sp) vil auke innsatsen mot villsvin med mål om å utrydde bestanden i Noreg.
Villsvin er ein stor trussel med tanke på introduksjon og spreiing av afrikansk svinepest. Mattilsynet og Miljødirektoratet utarbeidde i 2019 ein Handlingsplan mot villsvin der målet er at det skal vera minst mogleg villsvin i Noreg, spreidd over eit minst mogleg område.
– Eg har hatt møter med sentrale aktørar og det er ei felles forståing for alvoret i situasjonen og den risikoen villsvin inneber for dyrehelsa vår. Alle er samde om at villsvinbestanden i Noreg må ned. Det er sett i verk eit arbeid med å sjå på nye tiltak, men eg kan allereie no varsle at målet vil bli tydlegare og stramma inn. Målet må vera at vi skal utrydde villsvinbestanden i Noreg, seier landbruks- og matminister Geir Pollestad (Sp).
![Landbruks- og matminister Geir Pollestad](/contentassets/17c546f9877d44dfb7cf0c731736b2c4/_dsc6058-edit-16x9-f-torbjorn-tandberg.jpg?preset=article&v=-1425922440)
Utbrot av afrikansk svinepest i Sverige
Svenske styresmakter melde 6. september 2023 om utbrot av afrikansk svinepest hos villsvin i Fagersta. Dette er den første gongen denne alvorlege svinesjukdommen er påvist i Norden. Eit stort område på om lag ein million dekar er bandlagt, og det er innført omfattande restriksjonar på ferdsel, jakt og drift i skogen. Kommersielle svinehald blir avliva som eit førebyggjande tiltak.
![Villsvin.](/globalassets/departementene/lmd/dyr/vilt-og-ville-dyr/villsvin-colourbox42381813-16x9-f-colourbox.jpg?preset=article&v=1471626485)