Vil innfri lokalt ønske om forlenga bompengeperiode i Førdepakken
Pressemelding | Nr: 107/24 | Dato: 29.11.2024 | Samferdselsdepartementet
– Regjeringa la i dag fram eit forslag for Stortinget om å forlenge innkrevjinga av bompengar i Førdepakken med fem år. Med det seier vi ja til den forlenginga som det lokalt er ønske om, seier Samferdselsminister Jon-Ivar Nygård.
Førdepakken omfattar 18 ulike prosjekt i Sunnfjord kommune. Innkrevjinga av bompengar starta hausten 2016 og skulle etter planen avsluttast i 2028.
Sju av prosjekta er pågåande eller står att. Kostnadsoverslaga viser at fleire vil mangle finansiering dersom ikkje bompengeperioden blir forlenga. Sunnfjord kommune og Vestland fylkeskommune ønskjer derfor å forlenge bompengeinnkrevjinga med fem år til oktober 2033. Då vert det mogleg å finansiere alle dei 18 tiltaka i Førdepakken.
– Det er eit sterkt lokalpolitisk ønske om forlenging, og lokale styresmakter har køyrt ein ryddig prosess i saka og vist vilje til å gjere tiltak for å auke inntektene. Det er fatta lokale vedtak om å forlenge innkrevjinga samt lokalpolitiske vedtak med fornya garanti, dette er med i vurderinga når vi etterkjem ønsket om å forlenge bompengeperioden, seier samferdselsministeren.
Det reviderte finansieringsopplegget er rekna til å gje eit bompengebidrag på 615 millionar kroner i perioden 2028–2033 og 126 millionar kroner i mva-kompensasjon. Saman med midlane som står att frå tidlegare, gjev dette ei total ramme til vegprosjekt på 2 157 millionar kroner i perioden 2024–2033. Innkrevjinga skal førast vidare i dei fem bomstasjonane i Sunnfjord kommune.
Sjå også:
Prop. 33 S (2023–2024) Revidert finansieringsopplegg for Førdepakken i Vestland fylke