Carlos Vidal

Namn: Carlos Vidal
Tittel: Seniorrådgjevar på legemiddelseksjonen (LMS) i spesialisthelsetenesteavdelinga (SHA)
Utdanning: Mastergrad i farmasi (cand. pharm.) og mastergrad i helseøkonomi og leiing (MSc.)

Kvifor søkte du jobb i Helse- og omsorgsdepartementet (HOD)?

Lenge før eg begynte har eg tenkt på HOD som ein spennande, utfordrande og trygg arbeidsplass. Då eg såg at det blei lyst ut ei stilling innanfor mitt fagfelt (dvs. legemiddel), var det ikkje den minste tvil om at eg kom til å søke på jobben. Eg kunne ikkje la denne gylne moglegheita gå frå meg trass i mi avgrensa erfaring innan offentleg forvaltning (3 år). Du kan seie at eg lenge har vore motivert for å jobbe med helsefaglege problemstillingar på eit meir overordna nivå. HOD passar meg dermed utmerkt.

Korleis opplever du å jobbe her?

Eg føler på ein stoltheit, men òg eit stort ansvar overfor det norske folket. Avgjerder som blir tatt i HOD, kan ha direkte innverknad på menneske sine liv. Det at ein kan gjere ein forskjell for enkeltindivid er noko av det som motiverer meg mest ved jobben. Og så er det alltid hyggeleg å slå av ein kaffiprat med gode kollegaer.

Kva er ein typisk arbeidsdag for deg?

Det som i alle fall er typisk, er at det knapt finst typiske arbeidsdagar. Vi har faste vekentlege/månadlege møte, men det er ikkje alltid godt å vite kva som blir neste store sak eller kva som er i media sitt søkelys for tida. Ein kan planlegge for veka, men det er garantert at den ikkje blir som planlagt, og det er faktisk heilt greitt. At tempoet blir skrudd opp eller at det kjem ting frå sida er ein realitet ein lærer å bli vant til. Det hadde vore litt kjedeleg om det ikkje blei noko action i ny og ne.

Om ein av dine framtidige kollegaer les dette, kva råd ville du gje vedkommande om kva ein kan forvente her?

HOD er ein inkluderande arbeidsplass beståande av dyktige, engasjerte fagfolk. Det kan til tider vere hektiske arbeidsdagar som krev meir frå deg, men det finst heldigvis òg rolegare arbeidsdagar der ein kan jobbe meir fokusert. Ein kan ikkje alltid føreseie eller bestemme sjølv kva sluttresultatet i ei sak blir, men som tilsett blir ein vist høg grad av tillit og ansvar, samt at det finst gode moglegheiter for fagleg og personleg utvikling. Tolmod kjem òg godt med – særleg tolmod til å vekse i rolla som byråkrat og tolmod til å la enkelte saker modne. Ei villa endring krev ofte eit godt stykke arbeid over lengre tid.

Kan du gi eit døme på ei givande oppleving du har hatt i di tid i HOD?

For min del er det dei kvardagslege erfaringane, til dømes samtalar med kollegaer på huset eller i underliggande etatar, faglege diskusjonar i møte, samarbeid på tvers av seksjonar, avdelingar og departement, interaksjonar med eksterne aktørar og moglegheita til å vidareutvikle landets helsesystem som samla gjer jobben i HOD til ei givande oppleving.