7 % auke i sjukefråværet blant statstilsette i 1997
Historisk arkiv
Publisert under: Regjeringen Bondevik I
Utgiver: Arbeids- og administrasjonsdepartementet
Pressemelding | Dato: 15.04.1998 | Sist oppdatert: 21.10.2006
Pressemelding
Nr. 19/98
15.04.98
7 % auke i sjukefråværet blant statstilsette i 1997
Arbeids- og administrasjonsminister Eldbjørg Løwer varslar tiltak mot det aukande sjukefråværet i staten. Ho viser til at det totale sjukefråværet blant dei statstilsette gjekk opp med 7,2 % i 1997 i forhold til same periode i 1996. Fråvær på over 14 dagar viste en auke på 5,9 % og eigenmeldingar og sjukmeldingar på 1-3 dagar auka med 7,3 %. Auken i det totale sjukefråværet var størst blant mennene.
Sjukefråværsnivået blant dei statstilsette låg på 5,5 % i 3. kvartal 1997. Det er dei deltidstilsette og kvinnene som har det største sjukefråværet. Løwer seier at Regjeringa er opptatt av å senke sjukefråværet i staten, som i samfunnet elles.
- Vi set derfor nå i gang ulike prosjekt i fem statlege verksemder for å kunne betre arbeidsmiljøet og senke det arbeidsrelaterte sjukefråværet, seier Løwer. Statsråden opplyser at tiltaka vil omfatte NSB, Posten, Arbeidsmarknadsetaten, Trygdeetaten og Rikshospitalet. Arbeids- og administrasjonsdepartementet vil vere koordinator for prosjekta som vil bli gjennomførte med midlar frå Sosial- og helsedepartementet.
- Det er eit mål at ein gjennom desse prosjekta også skal kunne overføre erfaringar mellom dei verksemdene som deltar og vidare til andre statlege verksemder, seier statsråd Løwer.
Fråværsutviklinga i sjukefråværet fordelt kvartalsvis, viser at auken var størst i 1. kvartal 1997, med heile 11,6%. I dei resterande tre kvartala var auken på høvesvis 2,9 %, 5,9 % og 3 %. Bortsett frå for 1. kvartal 1997, var auken størst blant mennene.
Etter ein nedgang i fråværet i perioden 1991-1994 på 19 % har sjukefråværet vedvarande gått opp sidan 1995. I første halvår 1997 var reduksjonen frå perioden 1991-1994 "eten opp". Samanliknar vi med 1991, då sjukefråværsregistreringa starta, har fråværet nå auka med 5,8 %. Med unntak av for 1996, har auken vore størst for mennene.
Fråværsstatistikken for dei statstilsette viser ein generell auke i fråværet, utan at spesifikke verksemder har nokon gjennomgåande større auke enn andre. Fråværsnivået varierer likevel mye frå verksemd til verksemd og ser ut til å vere avhengig av dei typar arbeidsoppgåver som her blir utførte. Spesielt ser det ut til at verksemder prega av manuelle, tenesteytande og omsorgsbaserte yrke er spesielt utsette.
Kontaktpersonar: Avdelingsdirektør Finn Melbø eller førstekonsulent Lilly Ann Elvestad, Arbeidsgivaravdelinga tlf. 22 24 44 80 / 22 24 49 04
Lagt inn 15. april 1998 av Statens forvaltningstjeneste, ODIN-redaksjonen