Pressemelding

Nr. 55/98
Dato 9. oktober 1998

Fylkesmenn i Oslo/Akershus, Telemark og Vest-Agder

Røsjorde, Sollie og Olsen utnemnde til fylkesmenn

Regjeringa har i Statsråd fredag utnemnd nye fylkesmenn i Oslo/Akershus, Telemark og Vest-Agder. Stortingsrepresentant Hans J. Røsjorde blir fylkesmann i Oslo/Akershus, tidlegare stortingsrepresentant Solveig Sollie blir fylkesmann i Telemark og sysselmann Ann-Kristin Olsen blir fylkesmann i Vest-Agder.

I Oslo/Akershus overtar stortingsrepresentant Hans J. Røsjorde fylkesmannsembetet etter Kåre Willoch, som går av for aldersgrensa. Røsjorde er 57 år og utdanna cand.real frå Universitetet i Oslo. Han har vore stortingsrepresentant frå Hordaland for Fremskrittspartiet frå 1987. Røsjorde er idag visepresident i Stortinget og leiar av Forsvarskomiteen. Han har også erfaring frå kommunalpolitiske verv.

Solveig Sollie etterfølgjer Kjell Bohlin som fylkesmann i Telemark. Bohlin har nyleg gått av for aldersgrensa. Sollie har vore fast stortingsrepresentant for Kristeleg Folkeparti i Telemark frå 1985 til 1997 og vararepresentant frå 1981-85. Ho var statsråd i Familie- og forbrukardepartementet 1989-90. Sollie har brei erfaring frå partipolitisk verksemd og frå ei rekkje tillitsverv på kommunalt og fylkeskommunalt nivå og i frivillige organisasjonar. Solveig Sollie er 59 år og busett i Skien.

Sysselmann Ann-Kristin Olsen er utnemd til fylkesmann i Vest-Agder etter Oluf Skarpnes. Skarpnes (65) er etter søknad gitt avskil i nåde frå embetet frå 27. november 1998. Den nye fylkesmannen er 53 år gammal og utdanna cand.jur. frå Universitetet i Oslo. Med unntak av eitt år som dommarfullmektig har ho sidan 1973 hatt tilknyting til politietaten, frå 1983 som politimeister i Halden. Sidan 1995 har ho vore sysselmann på Svalbard med permisjon frå politimeisterembetet.

Kontakt for nærmare informasjon: Avdelingsdirektør Jon Lea, AAD, tlf. 2224 4976.