Pressemelding

Nr: 49/98
05.10.98

Vurdering av Statsbygg

Arbeids- og administrasjonsdepartementet vil i 1999 vurdere om det er behov for å gjennomføre organisatoriske endringar i Statsbygg.

Statsbygg er rådgivar i byggje- og eigedomssaker, byggherre, eigedomsforvaltar og eigedomsutviklar for departementa og statlege verksemder. I 1997 blei det rekneskapsført utgifter på vel 3,4 mrd kroner på byggje- og vedlikehaldsprosjekt der Statsbygg hadde byggherreansvaret. I 1997 blei det ferdigstilt meir enn 40 bygg, rehabiliterings- og vedlikehaldsprosjekt til ein samla sluttkostnad på i underkant av 2,3 mrd kroner. Samla sluttkostnad for fullførte bygg i 1997 oversteig kostnadsramma med om lag 2 pst. Dette er godt innanfor resultatkravet på 2,5 pst, og blir rekna som eit godt resultatmål i ein bygg- og anleggsmarknad prega av høg prisstiging. For 1998 tyder førebels tal på ei viss overskriding av resultatkravet.

Om lag 96,5 prosent av arbeid og tenester knytte til byggjeprosjekt i Statsbyggs regi blir kjøpte i den private marknaden etter tilbodskonkurransar. I dei seinare åra har Statsbygg i aukande grad komme i ein konkurransesituasjon. Blant anna blir stadig fleire nybygg som utelukkande er mynta på statlege leigetakarar førte opp av private byggherrar.

Arbeids- og administrasjonsdepartementet ser behov for å vurdere styring og organisering av Statsbygg i samband med endringane i dei ytre rammevilkåra. Ein ser det framleis som strategisk viktig og ønskjeleg at staten, gjennom Statsbygg, har råderett over ein viktig aktør i byggje- og eigedomsmarknaden der statlege verksemder vil vere store kundar. Men departementet ser det som naturleg å vurdere nærmare kva for eigedomskategoriar som det vil vere viktig for staten å eige og forvalte sjølv. Det gjeld også kva for nybygg Statsbygg skal vere obligatorisk byggherre for i framtida. Dette er bakgrunnen for at departementet vil vurdere behovet for å gjennomføre organisatoriske endringar i Statsbygg.