Pressemelding

Nr. 64/1999
Dato: 17. desember 1999

Forvaltningsnettsamarbeidet stopper prekvalifisering – nye utlysingar

På grunn av formelle feil og manglar ved vel halvparten av 144 prekvalifiseringssøknader til Forvaltningsnettsamarbeidet, har leiinga for prosjektet avgjort å stoppe prekvalifiseringsarbeidet. Om få dagar vil prosjektleiinga gå ut med nye utlysingar.

Dette inneber at dagens rammeavtaler sentralt må forlengjast med 2-3 månader, opplyser prosjektleiar Svein Sefland i Arbeids- og administrasjonsdepartementet. Sefland ventar ikkje at dette vil medføre særlege ulemper for kundane, og seier at nye rammeavtaler vil bli inngått før sommarferien.

I oktober annonserte Forvaltningsnettsamarbeidet (FNS) tre utlysingar på tele- og dataområdet, for å inngå nye rammeavtaler innan dagens avtaler utløper 30. mars 2000.

Etter at konsulentfirmaet Avenir har evaluert søknadene som kom inn, viser det seg at vel halvparten av søknadene har formelle feil og/eller mangler.

- At det kom inn så mange som 144 prekvalifiseringssøknader, viser at leverandørane har stor tru på Forvaltningsnettsamarbeidet, seier prosjektleiar Sefland. Han opplyser at FNS prinsippalt har invitert leverandørar som kan levere alle tenester og produkt nasjonalt. I tillegg har ein opna for at leverandørar med avgrensa teneste- og produkttilbod kan søkje om prekvalifisering.

- Ei førebels evaluering av søknadene viser at vi ikkje vil få mange nok prekvalifiserte leverandørar til å skape tilstrekkeleg konkurranse på dei tenester og produkt det blei spurt om. Ut frå regelverket for innkjøp har FNS rett til å kunne stoppe prekvalifiseringa, seier Sefland.

I neste søknadsrunde vil alle leverandørar stille på lik linje, både dei som søkte i oktober og nye søkjarar. Dei leverandørane som søkte i oktober og som ønskjer å delta også i neste runde, må ut frå regelverket søkje om prekvalifisering på nytt. Det vil om kort tid bli lagt ut annonser, søkjerettleiar og sjekkliste på FNS-sidene på Internett.

Sefland opplyser at det ikkje vil bli publisert kva for leverandørar som leverte feilfrie søknader eller kven som hadde feil og manglar i prekvalifiseringa som nå er stoppa. Kvar enkelt leverandør vil innan jul få brev med evt. oversikt over formelle feil/manglar i søknaden.

Kontaktperson: Rådgivar Svein Sefland, Statsforvaltningsavd., tlf 2224 4964