Pressemelding

Nr. 14/99
Dato: 08.03.99

Sjukefråværet i staten: Korttidsfråværet framleis ned, langtidsfråværet opp

Langtids sjukefråvær aukar framleis i staten, mens korttidsfråværet viser ein like stor nedgang. For 1998 er oppgangen i sjukefråværet på 3,4 prosent samanlikna med 1997. Mens fråværet over 14 dagar stig med 9,2 prosent, blir sjukefråvær under 14 dagar redusert med vel 10 prosent.

For fjerde kvartal 1998 førte auken i langtidsfråværet til at det totale sjukefråværet i staten gjekk opp med 2,8 prosent i forhold til same periode året før. Mens fråvær over 14 dagar gjekk opp med 8,6 prosent, var det ein ny markert nedgang i korttidsfråværet. Fråvær mellom 1 og 3 dagar gjekk ned med 2,4 prosent, mens fråvær mellom 4 og14 dagar viste ein nedgang på 12 prosent i fjerde kvartal 1998, samanlikna med same kvartal året før.

Kvinner hadde ein liten reduksjon på snautt ein prosent, mens menn hadde ein auke i sjukefråværet på 5,7 prosent. Deltidstilsette hadde ein reduksjon i det totale sjukefråværet på 2,1 prosent, mens heiltidstilsette hadde ein auke på 3,4 prosent.

Sjukefråværsnivået blant dei statstilsette låg på 5,8 prosent både i fjerde kvartal 1998 og for året sett under eitt. Trass i nedgangen hos deltidstilsette og kvinner er det framleis desse gruppene som har mest sjukefråvær. Fråværet var på 7,5 prosent for kvinner og 4,5 prosent for menn. Igjen er det langtidsfråværet som aukar, mens omfanget av kortare sjukefråvær blir redusert.

Arbeids- og arbeidsminister Løwer seier det er gledeleg at korttidssjukefråværet held fram med å synke, men uttrykker samtidig uro over auken i langtidsfråværet. Det er viktig å finne årsakene til denne auken, og dette vil vere ei av oppgåvene for utvalet som regjeringa skal oppnemne, seier statsråd Løwer. Utvalet skal sjå nærmare på årsakene til auken i sjukefråværet og nytilgangen til uførepensjon, samt foreslå tiltak som kan redusere sjukefråværet.

Kontaktpersonar: Avdelingsdirektør Finn Melbø eller førstekonsulent Hans Atle Gullestad, Arbeidsgivaravdelinga, tlf. 22 24 48 80 / 22 24 49 04