Pressemelding

Nr. 98090
04.11.98

Valgerd Svarstad Haugland opna barne- og ungdomsfilmfestival:

- Born og unge bør få påverka filmutvalet

- Kinosjefar bør bruka barn og unge som «konsulentar» når dei legg repertoaret for barne- og ungdomsfilm, sa barne- og familieminister Valgerd Svarstad Haugland då ho opna den første nasjonale barne- og ungdomsfilmfestivalen i Sandnes i dag.

Barne- og ungdomsfilmfestivalen i Sandnes er den første nasjonale filmfestivalen der brukarane sjølve; born, unge og foreldre, deltek aktivt saman med representantar for filmbransjen. Festivalen er open for alle interesserte, og blir gjennomført i samarbeid med skulen. Programmet vekslar mellom filmvising, seminar, kurs og diskusjonar.

- Film er oppleving av verkeleg og uverkeleg, og film kan setja heile kjensleregisteret i sving. Film opnar for å identifisera seg med rollefigurar, og det kan hjelpa oss til å utvikla toleranse og innsikt i tenkjemåten hos andre menneske og kulturar, sa Valgerd Svarstad Haugland ved opninga.

Barne- og familieministeren meiner det er behov for å retta søkjelyset mot det store mangfaldet av film- og medietilbod til dei unge. Ho åtvara mot særleg spekulative produkt med iskaldt menneskesyn og rollefigurar som utøver sadisme og grov vald.

- Dette er produkt som opptrer med forakt for menneskeverdet, og som kan gje heilt skeive signal om rett og galt. Born har rett til å bli verna mot informasjon og stoff som er skadeleg. Det er viktig at vi hjelper born og unge, slik at dei bileta som sit att i minnet, blir til glede og nytte, og ikkje til angst og forvirring, sa Svarstad Haugland.

Men statsråden peika òg på at born og unge er «ekspertar» på seg sjølve og sin eigen røyndom. Dei har rett til å søkja, få og spreia informasjon av alle slag:

- Born og unge bør difor ha høve til å påverka utvalet av film som blir vist. Det kan dei til dømes få gjennom meir kontakt med filmbransjen, ved å bli trekte med i omtalen av film, og ved at kinosjefar lokalt brukar born og unge som «konsulentar» når dei legg repertoaret sitt, sa Valgerd Svarstad Haugland.

Kontaktperson:
Informasjonssekretariatet, tlf. 22 24 24 07