Pressemelding

Nr. 085/98
Dato: 20. oktober 1998

Valgerd Svarstad Haugland på kontaktkonferansen:

- Regjeringa vil etablera Ungdommens Demokratiforum

- Arbeidet med born og unge sin medverknad må styrkjast. Som et ledd i dette arbeidet vil Regjeringa etablera eit «Ungdommens Demokratiforum», sa barne- og familieminister Valgerd Svarstad Haugland då ho i dag opna den årlege Kontaktkonferansen med frivillige barne- og ungdomsorganisasjonar.

I opningstalen sa statsråden at Regjeringa vil prioritera sterkare arbeidet med å sikra born og unge større deltaking og innverknad i samfunnet. Ho oppfordra alle kommunane til å setta av ein øyremerka sum pengar som born og unge sjølv kan avgjera bruken av.

- Men det er òg viktig å styrka born og unge sin medverknad på nasjonalt nivå, understreka ho. Derfor vil Regjeringa oppretta eit Ungdommens Demokratiforum. Her skal ungdom komma med innspel og råd til styresmaktene om korleis dei kan få større påverknad i samfunnet. Statsråden håpar at ungdommane som skal delta i forumet, kan starta arbeidet sitt rundt årsskiftet.

Løyver 300 000 kroner

Landsrådet for norske barne- og ungdomsorganisasjonar (LNU) har søkt Barne- og familiedepartementet om midlar til å laga ein presentasjon av barne- og ungdomsorganisasjonane i Noreg, og det arbeidet som blir drive der. I talen opplyste statsråden at departementet vil løyva 300 000 kroner til dette prosjektet. Ho sa òg at departementet har vore i dialog med LNU for å få barne- og ungdomsorganisasjonane med i Regjeringa sitt utviklingsprogram for styrking av oppvekstmiljøet. Betring av ungdom sine sjansar til deltaking og medverknad står sentralt i utviklingsprogrammet.

Kontaktperson: Informasjonssekretariatet, telefon 22 24 24 07