Pressemelding

Nr.: 99100
Dato: 09.11.99

Statsråd Svarstad Haugland i Nordisk Råd:- Tryggare internett for born og unge

- Bruken av internett i Norden aukar. Borna treng ofte internett til skulearbeidet sitt, men dette opnar samtidig for negativ informasjon. Eg er derfor positiv til at det blir etablert eit samarbeid mellom styresmakter, barneomboda i Norden og sentrale aktørar i bransjen for å utvikla eit filter, ”grøn inngang” til Internett, sa barne- og familieminister Valgerd Svarstad Haugland i Stockholm i dag.

- Noreg er med på å utvikla eit tiltaksprogram mot mobbing i grunnskulen. Eg er også positiv til å laga ei nordisk handbok om korleis vi kan motverka mobbing og vald blant born og ungdom, sa Valgerd Svarstad Haugland i innlegget sitt i Nordisk Råd.

Svarstad Haugland meiner handboka vil vera eit godt tiltak for det vidare arbeidet med å motverka mobbing og vald. Samtidig blir det peika på behovet for eit heilskapsyn på læring og sosial utvikling.

I innlegget sitt framheva statsråden at eit overordna mål for regjeringa er å sikra alle born og unge likeverdige tilbod og høve til utvikling, uavhengig av sosial og kulturell bakgrunn og kvar i landet dei bur. – Vi satsar på å auka medverknaden i planlegginga og utforminga av oppvekst- og nærmiljø. I tillegg vonar vi å få til ein felles tverrsektoriell innsats mot vald, mobbing, kriminalitet, rus og rasisme, sa statsråden.

Svarstad Haugland refererte også til Ungdommens demokratiforum som skal arbeida for å sikra ungdom større deltaking og medverknad i utviklinga i samfunnet.

- Demokratiforumet skal gje råd og innspel om dette til politiske styresmakter både statleg og lokalt, sa statsråden.

Kontakt:
Informasjonssekretariatet tlf. 22 24 24 07