Pressemelding

Nr.: 99117
Dato: 21.12.99

Regjeringa vil sikra full barnehagedekking:

800 millioner kroner ekstra til kommunane

- Kommunane skal kunna tilby barnehageplass til foreldra som ønskjer det. Derfor får kommunane 800 millionar kroner som mellom anna skal sikra utbygginga av barnehageplassar og dekka kommunane sine ekstra kostnader, slo statsråd Valgerd Svarstad Haugland fast då ho i dag presenterte den nye barnehagemeldinga.

Nokre av dei mest framheva punkta i den nye barnehagemeldinga er:

• Full barnehagedekking innan 2003.
• Tilboda skal ha høg kvalitet.
• Likeverdig behandling av kommunale og private barnehagar.
• Kostnadene skal delast 40 prosent stat, 30 prosent kommune og 30 prosent foreldre.

Regjeringa sitt mål

- Målet vårt er at alle familiar som ønskjer det, skal få eit barnehagetilbod i nærmiljøet sitt. Tilbodet skal integrera omsorg og pedagogikk, og vera tilpassa borna som treng ekstra innsats. Det skal vera variert, fleksibelt og brukarvennleg, understrekar barne- og familieministeren.

Sidan 1987 har talet på barnehageplassar auka frå 111 000 til 188 000. I dag har om lag 61 prosent av barn i målgruppa barnehageplass. På grunnlag av undersøkingar frå våren 1999, trur ein at det må etablerast i underkant av 25 000 nye barnehageplassar for å få full barnehagedekking. Størst er behovet for barn under tre år. Overslaget tar utgangspunkt i talet på barnehageplassar ved årsskiftet 1998/99 og svarar til at omlag 70 prosent av barna i aldersgruppa eitt til og med fem år har ein barnehageplass på heiltid eller deltid. (Stor uvisse er knytt til slike overslag.)

Kommunane sitt ansvar

Det er kommunane som har ansvaret for å planleggja og leggja til rette tilbodet i tråd med lokale tilhøve.

- Det er ein føresetnad at kommunane tar ansvar for utbygginga som står att. På grunnlag av behovsundersøkingar må kommunane utarbeida planar for å sikra den nødvendige utbygginga. Siktemålet er full behovsdekking for barn over 3 år i løpet av år 2000 og det same for barn under 3 år i løpet av 2003, seier Svarstad Haugland.

Private barnehagar

Regjeringa framhevar at private barnehagar må inngå som ein likeverdig og integrert del av barnehagetilbodet i kommunane. Regjeringa vil lovfesta ei plikt for kommunane til å inngå samarbeidsavtalar med eigarane av private barnehagar som er tatt med i dei kommunale barnehageplanane.

- Avtalane skal omfatta mellom anna økonomiske forpliktingar og tilhøve som er viktige for å få eit godt og heilskapleg barnehagetilbod i kvar kommune. Målet er økonomisk tryggare og meir stabile rammevilkår for dei private barnehagane, samtidig som dei kan vere meir målretta med på å fylla opp pliktene kommunen har overfor brukarane, understrekar statsråden.

Personal og rekruttering

Regjeringa vil ha ei god pedagogisk bemanning i barnehagane. Regelverket både for den totale bemanninga og for den pedagogiske bemanninga blir drøfta i meldinga, utan at det blir foreslått endringar.

Etter mange år med ei sterk utbygging av sektoren og med for liten kapasitet i førskolelærarutdanninga, skulle no kapasiteten rekkje til full førskolelærardekning innan få år.

- Det ser likevel ut til at rekrutteringa til barnehagane er i ferd med å svikta. Regjeringa ser alvorleg på dette og vil kartleggje situasjonen og vurdera tiltak som kan sikra rekruttering og stabilitet, seier Svarstad Haugland.

Kvalitet

Regjeringa vil leggja fram ein samla plan for ei kvalitetssatsing i barnehagesektoren for åra 2001–2003. Tre temaområde er sentrale i denne satsinga: Barnehage for alle barn, varierte og brukartilpassa barnehagar i tråd med barna og foreldra sine og eit kompetent barnehagepersonale.

- Målet er at alle barnehagar skal ha etablert system for å utvikla og sikra kvaliteten i løpet av 2003. Ansvar og oppgåver innanfor ein plan for kvalitetsutvikling på barnehagesektoren må fordelast mellom den enkelte barnehagen/barnehageeigaren, kommunane og staten, seier Svarstad Haugland. Ho peikar på at dette inneber mellom anna å utforma, vurdera og følgja opp kriterium for kvalitet.

linkdoc004005-074013#docVedlegg

linkdoc004005-044002#docStortingsmelding 27

Kontakt:
Informasjonssekretariatet tlf. 22 24 24 07