Pressemelding

Nr. 70/1999
Dato: 11. august 1999

Modernisering av likestillingslova:

Utvida vern mot lønsdiskriminering

- Retten til lik løn for arbeid av lik verdi må utvidast slik at den gjeld på tvers av faggrenser og tariffavtaler. Regjeringa vil også vurdera tiltak for å sikra at fleire kvinner blir representert i styre, sa barne- og familieminister Valgerd Svarstad Haugland då ho presenterte dei viktigaste forslaga til modernisering av likestillingslova onsdag. Regjeringa sender om kort tid forslaga ut på høyring.

- Den lovfesta retten til lik løn for arbeid av lik verdi er i praksis avgrensa til å gjelda identisk arbeid eller heilt like stillingar. Dette er ikkje tilstrekkeleg til å fjerna den diskrimineringa som skjer ved ulik verdsetjing av manns- og kvinnedominerte yrke, fastslår Valgerd Svarstad Haugland.

Regjeringa går inn for å endra regelen om likeløn slik at arbeidstakaren kan krevja at det blir fastsett lik løn for arbeid av lik verdi også på tvers av faggrenser og tariffavtaler.

- Arbeidsvurdering vil vera eit middel til å effektivisera ein slik regel, seier Svarstad Haugland.

Likestillingslova krev at begge kjønna skal vera representert med minst 40 prosent av medlemene i alle styre, råd og utval som er oppnemnd av det offentlege.

- Denne regelen har vist seg svært effektiv. Derimot er kvinner altfor dårleg representert i styre for private og halvoffentlege bedrifter. Her bør det skje ei endring. Regjeringa ønskjer å finna fram til reglar som kan sikra ein viss minsterepresentasjon av begge kjønn i styre, anten dei er delvis offentleg eller privat oppnemnde. Høyringsforslaget vil derfor omfatta fleire forslag om aktuelle reglar som kan sikra ein meir likeverdig kjønnsrepresentasjon, seier barne- og familieministeren.

-----

Priv. til red.:

linkdoc004005-070325#docVedlagt følgjer ein oversikt over dei viktigaste forslaga til endring av likestillingslova.

Kontaktperson: Torstein Rudi, telefon 22 24 24 09 / 91 69 69 25