Pressemelding

Nr.: 99084
Dato: 24.09.1999

Vil endre marknadsføringslova:

Tiltak mot uønska reklame

Folk sine forbrukarrettar skal styrkjast. Regjeringa foreslår difor fleire endringar i marknadsføringslova. – Vi foreslår at forbrukaren som mottakar på førehand skal gi samtykke til at telefaks eller e-post kan nyttast ved marknadsføring, seier forbrukarminister Valgerd Svarstad Haugland.

- Hovudmålet med endringane i marknadsføringslova er å sikra forbrukarane høve til å reservera seg mot uønska reklame ved fjernsal av varer og tenester, seier statsråden. Ho sender forslaget ut på høyring. Forslaga er ei oppfølging av EU sitt direktiv om fjernsal. Departementet har tidlegare i samband med same direktivet lagt fram forslag til endringar i angrefristlova.

Dei viktigaste momenta i forslaget er:

• Mottakaren skal på førehand samtykkja i at telefaks, e-post og andre automatiserte system kan nyttast for marknadsføring.
• Forbod mot å levera uadressert reklame til forbrukarane som har gitt beskjed om at dei ikkje ønskjer slik reklame.
• Lovfesta at marknadsføringa skal stå fram som det det er slik at den kommersielle bodskapen kan kjennast att. Det redaksjonelle stoffet må ikkje kunna forvekslast med marknadsføringa.
• Forbod mot å krevja betaling for varer og tenester som ikkje er bestilt uavhengig om dei blir levert eller ei. Dette forslaget vil råka såkalla ”kataloghaiverksemd” og ”fakturasvindel”.

Ei fersk NHO-gransking viser at 69 prosent av små og mellomstore verksemder opplever fakturasvindlarar som plagsame. - Regjeringa vil ha eit klarare forbod som gjer det lettare å handheva forbod mot svindel, seier Svarstad Haugland.

Statsråden legg til at Justisdepartementet vil etablera eit sentralt reservasjonsregister mot marknadsføring ved bruk av til dømes telefon. Ho peikar på at forbrukarar skal kunna reservera seg mot all adressert reklame, inkludert telefonsal. I tillegg vil næringsdrivande måtta ”vaska” listene sine mot registeret minst fire gonger kvart år.