Pressemelding

Nr.: 52/99
Dato: 17. august 1999

Forsvarsministeren skaffar to minedykkarfartøy til sjøforsvaret – oppdraget til Harstad-regionen

Forsvarsminister Eldbjørg Løwer har vedtatt at to av Forsvaret sine landgangsfartøy skal ombyggjast til minedykkarfartøy. Oppdraget skal gjennomførast i Harstad-regionen, og vil medføre positive ringverknader for ei rekkje bedrifter i området. Ombygginga vil inngå som eit prosjekt i omstillingsprogrammet som er sett i verk for verkstadsindustrien i Sør-Troms og Nordre Nordland. Programmet har som formål å styrkje interessa for og konkurranseevna for heile miljøet i regionen.

Evne og utstyr til minedykkeroperasjonar er viktig for å sikre forsyningssituasjonen til Noreg. Sjøforsvaret har i lang tid hatt behov for nye minedykkarfartøy, men trong økonomi har medført at Forsvaret ved fleire høve har utsett prosjektet. Forsvarsministeren har i samband med revidert nasjonalbudsjett skaffa dei naudsynte midlane. Oppdraget vil starte så snart det er praktisk mogeleg. Kostnadene er rekna ut til omkring 70-90 millioner kroner fordelt over tre år, av dette omkring 20 millioner kroner det første året. Pengane blir tatt frå det ordinære forsvarsbudsjettet.