Pressemelding

NR. 26/97
14. juli 1997

Regulering av makrellfisket

Fiskeridepartementet har fastsett regulering av makrellfisket for 1997. Av den norske totalkvoten på 133.210 tonn kan ringnotfarøya fiske 110.280 tonn, kystfartøya 20.000 tonn og trålarane 2.930 tonn.

Kystfartøygruppa vert i reguleringssamanheng delt i to slik at notfartøy under 13 meter og fartøy som fiskar med garn og snøre kan fiske 10.000 tonn. Kvart av desse fartøya kan maksimalt fange 85 tonn. Kystnotfartøya over 13 meter kan samla også fiske 10.000 tonn, maksimalt 225 tonn pr fartøy. Desse fartøya kan ikkje starte fisket på sin del av gruppekvoten før 18. august. For å delta i fisket må kystnotfartøya over 13 meter ha delteke i makrellfisket i 1996 eller i minst to av åra 1993 til 1995.

Ringnotfisket vert regulert med fartøykvotar og trålfisket med maksimalkvotar. Siste startdato for ringnotfartøya er 15. september nord for 62. graden og 1. oktober sør for 62. graden. Trålfisket opnar 1. november.