Pressemelding

Nr.: 78 /99
Dato:17. desember 1999

Deltakarregulering for fartøy over 28 meter som fiskar med konvensjonelle reiskapar i 2000

Regjeringa har fastsett forskrift om deltaking i fisket i 2000 for fartøy på 28 meter og over som fiskar med konvensjonelle reiskapar (alle reiskapar utanom trål og not). Forskrifta gjeld alt fiske etter torsk, hyse, sei, brosme, lange, blåkveite, uer og steinbit.

Deltakarforskrifta for 2000 er i all hovudsak ei vidareføring av deltakarforskrifta for 1999. For å kunne delta i fisket i 2000 må fartøyet ha deltatt i dette fisket i minst eitt av åra 1996, 1997 eller 1998. For å kunne delta i fisket etter sei med garn i 2000, må fartøyet ha hatt høve til å delta i seifisket med garn i 1998.

Ved sal av konvensjonelle fartøy på 28 meter eller over kan Fiskeridirektoratet gje den nye eigaren høve til å delta i fisket dersom både kjøpar og seljar har vore førde i fiskarmanntalet i same fylke i minst 12 månader før kjøp av fartøyet. Direktoratet kan gje dispensasjon frå dette kravet når fartøyet vert kjøpt frå eit anna fylke til Nord-Troms og Finnmark, og ved sal mellom nabofylke når det er naturleg å sjå kjøpar og seljar sine distrikt som eitt område i kvotesamanheng. Dessutan ser ein Skagerrakkysten som eitt område i denne samanhengen, på grunn av særlege forhold i distriktet frå svenskegrensa til og med Vest-Agder fylke.

Dersom ein skifter fartøyet sitt ut med eit nytt, kan erstatningsfartøyet etter dagens reglar ikkje vere over 40 meter. Denne grensa vil i 2000 også gjelde ved ombygging/forlenging av fartøyet.

Kontaktperson
Ekspedisjonssjef Johán H. Williams 22 24 64 09 m. 90 02 44 46