Pressemelding

Nr. 92/99
Dato: 22. des. 1999

Regulering av hysefisket i 2000

Fiskeridepartementet har fastsett regulering av hysefisket med konvensjonelle reiskapar nord for 62. graden i 2000. I følgje Det internasjonale råd for havforsking er gytebestanden over føre var-nivået, men fiskedødelegheita er for høg, og fangstuttaket bør reduserast. Den norske delen av hysekvoten for 2000 er 38.400 tonn. Det er 7.600 tonn mindre enn i 1999.

Av den norske totalkvoten kan den konvensjonelle flåten fiske 23.400 tonn. I reguleringa for 2000 vert denne gruppekvoten delt i ein kvote for fartøy over 28 meter og ein kvote for fartøy under 28 meter. Fartøya over 28 meter får 18 prosent av gruppekvoten, og det utgjer 4.200 tonn. Denne andelen er identisk med framlegget Norsk Sjømannsforbund fremma i Reguleringsrådet. Fartøya under 28 meter får ein kvote på 19.200 tonn.

I gruppa under 28 meter vert fisket regulert med maksimalkvotar etter lengda på fartøyet – 12 tonn for fartøy under 14 meter, deretter 18 tonn og 24 tonn for dei største. Fartøy under 11 meter kan fiske innanfor ein garantert kvote på 5 tonn sjølv om gruppekvoten er berekna oppfiska.

Fartøy på eller over 28 meter kan fiske 52 tonn hyse. Dei som fiskar med line eller i kombinasjon med line må sette av 30 prosent av fartøykvoten til fiske etter 1. september.

Fiskeridirektoratet kan stogge fisket for fartøy under 28 meter når 25 prosent av gruppekvoten er berekna oppfiska. Når det direkte hysefisket er stogga eller når det enkelte fartøy har fiska sin maksimalkvote, kan fartøy under 28 meter likevel ha inntil 25 prosent bifangst av hyse ved landing. For dei fartøya under 28 meter som leverer fleire gonger i veka vert bifangsten avrekna på vekebasis. Fartøy under 28 meter kan ikkje fiske meir hyse som bifangst enn 50 prosent av fartøyet sin maksimalkvote. Det gjeld for heile året, og den enkelte fiskar må planlegge fisket sitt utfrå dette. Dei nye bifangstbestemmelsane skal medverke til ei betre gjennomføring av fisket.

Reguleringsrådet vil kome saman i løpet av første halvår 2000 for å gå gjennom utviklinga i fisket og føreta eventuelle justeringar av reguleringane.

Kontaktperson
Ekspedisjonssjef Johán H. Williams 22 24 64 40 m. 90 02 44 46