Pressemelding

Nr. 12/1999
Dato: 23. februar 1999

Regulering av selfangsten i 1999

Fiskeridepartementet har fastsett reguleringar for selfangsten i 1999. I Vestisen startar fangsten etter klappmyss 22. mars og etter grønlandssel 10. april. I Austisen startar fangsten av grønlandssel 23. mars. Fangsten i Austisen skal vere avslutta ved utgangen av 20. april og i Vestisen ved utgangen av 5. mai, men dersom ver- og isforholda tilseier det kan fangstperiodane forlengast.

Dei som ønskjer å delta i selfangsten må melde seg til Fiskeridirektoratet innan 2. mars. Det vil også i år bli offentlege inspektørar på alle selfangstfartøya.

Selfangsten omfattar vaksne dyr og ikkjediande ungar. I Austisen er den norske kvoten 5.000 vaksne grønlandssel. Kvoten kan heilt eller delvis takast som ikkjediande ungar, og då tilsvarar 2,5 ungar eitt vakse dyr. I Vestisen er totalkvoten 17.500 vaksne grønlandssel og 11.200 vaksne klappmyss. Av dette kan norske fartøy fange 15.000 grønlandssel og 8.400 klappmyss. Her tilsvarar to ikkjediande ungar av grønlandssel eitt vakse dyr, og 1,5 ikkjediande unge av klappmyss eitt vakse dyr. Kvotane er fastsette på bakgrunn av tilrådingar frå Det internasjonale råd for havforsking.

Den økonomiske støtta til gjennomføringa av selfangsten i 1999 vil bli fastsett om kort tid.

Kontaktperson: Informasjonssjef Bjarne Myrstad 22 24 64 09