Pressemelding

Nr. 88 /99
Dato 22. des. 1999

Trålfisket etter torsk og hyse i 2000

Fiskeridepartementet har fastsett regulering av trålfisket etter torsk og hyse nord for 62. graden i 2000. Trålarane kan fiske 57.250 tonn torsk og 15.000 tonn hyse i 2000.

Ferskfisktrålarar over 250 BRT og 115 fot største lengde, rundfrysetrålarar over 400 BRT, saltfisktrålarar over 400 BRT og fabrikkskip, kan fiske inntil 630 tonn torsk og 159 tonn hyse. Minst 20 prosent av årskvoten av torsk og hyse for ferskfisktrålarane skal fiskast etter 1. september.

Småtrålarar under 60 BRT og 21 meter kan fiske inntil 145 tonn torsk og 37 tonn hyse. Fartøy mellom 60 og 250 BRT og mellom 21 og 34 meter kan fiske inntil 221 tonn torsk og 56 tonn hyse. Fartøy som i eitt av dei tre siste åra har hatt kvote som tilsvarar meir enn 50 prosent av ein stortrålarkvote, kan i 2000 tildelast ein kvote som tilsvarar mellom 50 og 75 prosent av ein stortrålarkvote. Fartøy som er større enn 250 BRT og 34 meter, og som i kraft av konsesjonsvilkåra har ein avgrensa rett til kvote, kan tildelast kvote utover 221 tonn torsk og 56 tonn hyse; likevel ikkje meir enn 75 prosent av ein stortrålarkvote.

Det er avsett 750 tonn torsk og 750 tonn hyse til dekning av bifangst for fartøy med seitrålløyve.

Kontaktperson
Ekspedisjonssjef Johán H. Williams 22 24 64 40 m. 90 02 44 46