Pressemelding

Nr. 80/98
20.11.1998

Fullmakt for opptak av statslån i 1999

Finansdepartementet legg i dag fram proposisjon om fullmakt til å ta opp innanlandske og utanlandske statslån i 1999. Statens brutto finansieringsbehov i 1999 er 35,3 mrd. kroner og har samanheng med avdragsbetalingar på statsgjelda og netto utlån til statsbankane mv.

Overskotet på statsbudsjettet, som i Nasjonalbudsjettet 1999 er anslått til 52,2 mrd. kroner, vil i sin heilskap bli overført til Statens petroleumsfond. Finansieringsbehovet vil etter planen bli dekt ved opptak av nye lån innanlands.

Utviklinga i valuta-, penge- og kredittmarknadene har vist at det er ønskjeleg å ha rommelege fullmakter slik at ein kan tilpasse statens låneprogram til skiftande forhold gjennom året. Finansdepartementet har derfor bedt om fullmakter til opptak av lån som samla sett overstig statens lånebehov. Fullmakta for opptak av nye langsiktige innanlandske lån er foreslått sett til 50 mrd. kroner og for nye lån i utanlandsk valuta tilsvarande 10 mrd. kroner. Fullmakta for maksimalt uteståande i kortsiktige marknadspapir (statssertifikat mv.) og andre kortsiktige lån blir foreslått halden uendra på høvesvis 150 mrd. kroner og 90 mrd. kroner.

I desember vil Finansdepartementet og Noregs Bank offentleggjere ein auksjonskalender for salet av statsobligasjonar og statssertifikat i første halvår 1999.

Kontaktperson: Anne-Sissel Skånvik, telefon 22 24 41 09