Norsk tilslutning til OECD-konvensjonen mot korrupsjon
Historisk arkiv
Publisert under: Regjeringen Bondevik I
Utgiver: Justis- og politidepartementet
Pressemelding | Dato: 29.05.1998 | Sist oppdatert: 21.10.2006
Pressemelding
29-98
29. mai 1998
Norsk tilslutning til OECD-konvensjonen mot korrupsjon
Regjeringa fremma i statsråd i går forslag om norsk tilslutning til OECD-konvensjonen av 21. november 1997 om å arbeide mot bestikking av utanlandske offentlege tenestemenn i internasjonale forretningshøve. Samstundes er det gjort framlegg om visse endringar i straffelova som følgje av konvensjonen. Forslaget er fremma som linkdoc012005-050027#docOt prp nr 66 (1997-98).
Hovudformålet med OECD-konvensjonen er at partane skal ha plikt til å setje straff for bestikking av utanlandske offentlege tenestemenn. OECD-landa er sentrale land i verda innan internasjonal handel og investeringar. Korrupsjon vert rekna som eit stort problem i slike internasjonale tilhøve. Konvensjonen vil gjere det mogeleg for partane å utvikle lik nasjonal lovgjeving på dette viktige området. Konvensjonen vart forhandla fram i 1997, og arbeidet blei avslutta i november 1997. Avtalen blei underteikna i desember same året.
Forslaget om endringar i straffelova inneber eit uttrykkjeleg forbod i straffelova § 128 mot å gje stikkpengar eller andre urettkomne føremoner til utanlandske offentlege tenestemenn. Forbodet i straffelova § 128 femner i dag berre om norske offentlege tenestemenn. Til no har påtalemakta difor berre kunna nytte straffelova §§ 275 og 276 om utruskap når mottakaren er ein utanlandsk offentleg tenestemann. I somme høve har det likevel vore vanskeleg å føra prov for at vilkåra for utruskap er oppfylt, slik at det er trong til ein klarare straffeheimel.
Den konvensjonen som no ligg føre, er eit første steg i eit omfattande internasjonalt arbeid som rettar seg mot korrupsjon. Europarådet arbeider no med å utforme ein generell strafferettsleg konvensjon mot korrupsjon. Ein slik konvensjon kan verte vedteken hausten 1998. Den vil ha eit monaleg vidare verkeområde enn OECD-konvensjonen. Regjeringa tek sikte på å følgje opp arbeidet innan Europarådet gjennom å gjere eit breitt oversyn over norske straffereglar som kan nyttast mot korrupsjon. I internasjonal samanheng ligg Noreg allereie langt framme på dette området. Det har likevel gjennom ei viss tid vore eit ønskje, mellom anna frå økokrim, om i større grad å få straffereglar som er direkte retta mot korrupsjon.
Lagt inn 29. mai 1998 av Statens forvaltningstjeneste, ODIN-redaksjonen