Pressemelding

Nr. 89/98
05.10.98

Etablering av nasjonalbibliotekavdelinga i Oslo

Frå 1. januar 1999 skal dei nasjonale bibliotekfunksjonane som hittil har lege til Universitetsbiblioteket i Oslo, skiljast ut og nyorganiserast som Oslo-avdelinga av eit frittståande nasjonalbibliotek med operative avdelingar i Oslo og Rana og med ei overordna leiing i Oslo. Nasjonalbibliotekavdelinga i Oslo tek over dei tidlegare lokala til Universitetsbiblioteket i Oslo, som skal flytte inn i nye lokale på Blindern i løpet av våren 1999.

Til saman er det overført 35,8 mill kroner frå Kyrkje-, utdannings- og forskingsdepartementets budsjett i samband med overtakinga av nasjonalbibliotekfunksjonane. I tillegg har Kulturdepartementet foreslått at det skal leggjast inn 15 mill kroner i nye midlar i drifttilskot til Nasjonalbibliotekavdelinga i Oslo for at drifta skal kome i gang frå 1999. Heile løyvinga til den nye nasjonalbibliotekavdelinga i Oslo vil da vere på om lag 50 mill kroner.

Den foreslåtte summen skal dekkje lønsmidlar til 114 stillingar. Av desse skal 108 overførast frå Universitetet i Oslo, medan seks vart tilsette hos Nasjonalbibliotekaren alt i 1998. I Kulturdepartementets budsjett for 1999 er det også lagt inn midlar til drift av den nye avdelinga og drift av bygningen på Solli plass.

Kontaktperson:

Ekspedisjonssjef Kjell Myhren, Kulturavdelinga, tlf. 22 24 80 00