Pressemelding

Nr. 78/98
Dato: 5. oktober 1998

Styrking av museumssektoren

Regjeringa ønskjer å betre det desentraliserte museumstilbodet i landet og styrkjer derfor museumsdrifta i fylkeskommunane med 10 mill kroner, ein auke på 9 prosent i høve til 1998. Dei om lag 260 musea som er omfatta av ordninga, vil med dette få større handlerom og auka aktivitetsnivå.

Tilskotet til Norsk Skogbruksmuseum blir auka med vel ein mill kroner til 7,69 mill kroner. Auken vil særleg styrkje utstillingsverksemda ved museet.

Norsk museum for fotografi har hittil halde til i dei gamle lokala til Preus fotomuseum i Horten. Museet har no flytt samlingane til mellombels lokale på Karljohansvern, der ein arbeider med å leggje til rette nye museumslokale. Det er sett av ein mill kroner til auka utgifter i samband med nyetableringa.

Departementet gjer framlegg om å auke tilskotet til Ringve Museum med kr. 400 000. Etter planen skal museet ha den nye basisutstillinga ferdig våren 1999 og har behov for ein ny konservator for å kunne gjere samlingane betre tilgjengelege og for å betre bevaringsarbeidet.

Kontaktperson: Ekspedisjonssjef Kjell Myhren, Kulturavdelinga, tlf. 22 24 80 00