Pressemelding

Nr.: 96/99
Dato: 18. november 1999

Midlar til norsk-islandsk kultursamarbeid i 2000

På Kulturdepartementets budsjett er det foreslått løyvd 1 mill. kroner til å styrke det kulturelle samarbeidet mellom Noreg og Island i 2000. Løyvinga er no fordelt i samarbeid med det islandske kulturdepartementet, men sjølvsagt med atterhald om Stortingets budsjettvedtak.

Henie Onstad kunstsenter vil få 400 000 kroner i 2000 og det same året etter til å skipe til ei utstilling av islandsk samtidskunst. Den islandske komponisten Másson vil få 80 000 kroner i 2000 og i 2001 for å gjere ferdig ein opera bygd over Tarjei Vesaas’ roman Isslottet. Av løyvinga elles vil 150 000 kroner gå til ferdigstilling av Snorrestova som tidlegare har fått løyvd 300 000 kroner. 100 000 kroner skal gå til vidareføring av eit prosjekt som skal fremje omsetjing av islandske barnebøker til norsk. Til saman er det sett av 620 000 kroner fordelt over tre år til dette prosjektet.

Kontaktperson: Avdelingsdirektør Stein Sægrov, Kulturavdelinga, tlf. 22 24 80 26