Pressemelding

Nr. 24/1999
Dato: 30. april 1999

Speleoverskot til idrettsformål

Fordelinga av den tredelen av 1998-overskotet i Norsk Tipping A/S som går til idrettsformål, vart fastsett i statsråd fredag. Beløpet på 667,0 mill kroner er 44,425 mill kroner større enn året før og inkluderer også tidlegare tilskot over statsbudsjettet til m.a. idrettsstipend.

316,0 mill kroner av midlane går til idrettsanlegg. Av desse går mesteparten, 307,0 mill kroner, til idrettsanlegg i kommunane og 9,0 mill kroner til anlegg for friluftsliv i fjellet. 30,0 mill kroner går til framtidige nasjonalanlegg og 19,295 mill kroner til spesielle anlegg.

Norges Idrettsforbund og Olympiske Komité har fått overført til saman 267,803 mill kroner. Av dette beløpet utgjer rammetilskotet 216,353 mill kroner, og 9,75 mill kroner er sette av til OL-deltaking. 41,7 mill kroner er øyremerkte midlar. Av dette går 8,3 mill kroner til antidopingarbeid, 6,5 mill kroner til barn og unge, 5,0 mill kroner til kvinner, 1,1 mill kroner til eldre, 4,5 mill kroner til integrering av funksjonshemma, 0,3 mill kroner til idrett for psykisk utviklingshemma, 3,0 mill kroner til FoU-arbeid, 8,0 mill kroner til idrettsstipend og 5,0 mill kroner til spesielle tiltak for unge idrettsutøvarar.

Til grupper med spesielle behov er det avsett 3,0 mill kroner. 2,0 mill kroner går til forsking og utviklingsarbeid i regi av Kulturdepartementet, 7,0 mill kroner til idrettsforsking i regi av Noregs forskingsråd og 2,63 mill kroner til Hormonlaboratoriet ved Aker sjukehus. 7,05 mill kroner går til tiltak i dei større byane og 4,18 mill kroner til vidareutvikling av fylkeskommunal idrettspolitikk.

Kontaktperson: Ekspedisjonssjef Hans B. Skaset, tlf. 22 24 80 50