Pressemelding

29. mai 1998

2,6 millionar kroner til vassverk i Sande

Kommunal- og regionaldepartementet gir eit tilskot på inntil 2,6 millionar kroner til Sande kommune i Møre og Romsdal. Tilskotet skal brukast til naudsynte utbetringstiltak ved Morkavatn vassverk, første byggjesteg. Morkavatn vassverk vil ferdig utbygd forsyne omlag 740 bustader i tillegg til ulike typar servicefunksjonar og anna næringsverksemd.

Kostnadene i samband med første byggjesteg er rekna til omlag 5,2 millionar kroner og gjeld arbeider som vil bli gjennomført i 1998. Arbeida inngår i ein 4-årig utbyggingsplan når det gjeld vassforsyninga, som totalt er kostnadsrekna til omlag 12,8 millionar kroner.

Støtteordninga Program for vassforsyning er eit 5-årig program. Det gir økonomisk stønad der naudsynte utbetringstiltak blir urimeleg dyre for abonnentane.