87 millioner kroner til næringslivet i distriktene
Historisk arkiv
Publisert under: Regjeringen Bondevik I
Utgiver: Kommunal- og regionaldepartementet
Pressemelding | Dato: 02.07.1998 | Sist oppdatert: 21.10.2006
Pressemelding
Dato: 2. juli 1998
87 millioner kroner til næringslivet i distriktene
Kommunal- og regionaldepartementet fordeler no 87 millionar kroner til fylkeskommunane som kan vise til dei beste resultata i arbeidet med å utvikle næringslivet i distrikta. Rogaland og Troms peikar seg ut som dei «beste» forvaltarane av verkemidla.
- Midlane er fordelt etter dei resultata som fylkeskommunane har oppnådd i samsvar med nasjonale mål. Med desse midlane ønskjer vi å stimulere til lønnsame og langsiktige arbeidsplassar i distrikta. Også i økonomisk gode tider som vi har no, er det viktig med ein ekstra innsats for å utvikle eit framtidsretta næringsliv i distrikta. Dette er avgjerande for at unge skal ønskje å busetje seg der også i framtida, seier statssekretær Per N Hagen.
Rogaland og Troms er dei fylkeskommunane som er kome best ut i fordelinga av mål- og resultatpotten for dei bedriftsretta distriktspolitiske verkemidla i 1998. Desse fylka utmerker seg ved å ha kanalisert store delar av innsatsen til nyetablering, nyskaping, omstilling og knoppskyting. I tidlege fasar av slike utviklingsprosjekt er det ofte vanskeleg for bedriftene å skaffe nok risikovillig kapital i den private marknaden. Rogaland utmerker seg i tillegg ved at bedriftene som har fått støtte, har oppnådd gode resultat både når det gjeld lønnsemd og sysselsetjing.
- Målet med systemet er å målrette innsatsen betre, og å få større effekt ut av kvar krone, seier statssekretær Per N. Hagen.
Midlane er fordelt med 62 millionar kroner i distriktsutviklingstilskot og 25 millionar kroner i risikolån. Dette utgjer 15 prosent av ramma for dei bedriftsretta distriktspolitiske verkemidla. Dei resterande 85 prosent blei tildelt fylkeskommunane allereie ved årsskiftet utifrå kriterium som folketettleik og sysselsetjing. Samanlikna med fjorårets tildeling er Troms det fylket som har avansert mest. Rogaland har også tidlegare vore høgt oppe på lista.
Oslo, 2. juli 1998
Vedlegg:
Tabell som viser fordelinga av dei bedriftsretta distriktspolitiske verkemidla til fylkeskommunane.
Fordeling av rammer etter mål- og resultatstyringskriterium for distriktsutviklingstilskot (MRS) og distriktsretta risikolån. Tall i 1000 kr.
Fylkes-kommunar | Distriktsutviklings-tilskot | Risikolån | Sum distriktsutviklings-tilskot og risikolån | Fordeling i prosent |
MRS-tildeling(1) | Endeleg ramme(2) | MRS-tildeling | Endeleg ramme | MRS-tildeling | Endeleg ramme | Fordeling i pst(3) | |
Rogaland | 1401 | 5318 | 1141 | 4338 | 2542 | 9656 | 115 |
Troms | 15793 | 63313 | 5631 | 22611 | 21424 | 85924 | 113 |
Telemark | 4976 | 21178 | 2242 | 9560 | 7218 | 30738 | 111 |
Buskerud | 2100 | 9550 | 1289 | 5874 | 3389 | 15424 | 109 |
Nordland | 20594 | 100812 | 6819 | 33458 | 27413 | 134270 | 107 |
Vest-Agder | 502 | 2671 | 584 | 3114 | 1086 | 5785 | 105 |
Hordaland | 2454 | 15123 | 1272 | 7865 | 3726 | 22988 | 101 |
Aust-Agder | 718 | 4425 | 590 | 3648 | 1308 | 8073 | 101 |
Oppland | 3172 | 23523 | 1388 | 10337 | 4560 | 33860 | 98 |
Hedmark | 2882 | 24935 | 1206 | 10484 | 4088 | 35419 | 96 |
Møre og R | 2771 | 29048 | 1195 | 12603 | 3966 | 41651 | 94 |
Finnmark | 1822 | 34919 | 563 | 10934 | 2385 | 45853 | 90 |
N.-Trøndelag | 1541 | 29545 | 606 | 11765 | 2147 | 41310 | 90 |
Sogn og Fj. | 1556 | 29832 | 670 | 13016 | 2226 | 42848 | 90 |
S.-Trøndelag | 100 | 21693 | 33 | 8589 | 133 | 30282 | 85 |
Sum | 62382 | 415885 | 25229 | 168196 | 87611 | 584081 |
(1) MRS-tildelinga er summen som no blir fordelt etter mål- og resultatsstyringskriteria (15 prosent av den totale ramma).
(2) Endeleg ramme er summen av tidlegare fordelt ramme (85 pst) og ramma fordelt etter mål- og resultatstyringskriteria.
(3) Fordeling i prosent viser korleis mål- og resultatstyringspotten slår ut på den endelege fordelinga av ramma. For eksempel har Rogaland fått tildelt ei ramme på 115 pst av den ramma fylkeskommunen ville ha fått tildelt dersom heile ramma hadde blitt fordelt etter objektive kriteria (100 prosent).
Lagt inn 2. juli 1998 av Statens forvaltningstjeneste, ODIN-redaksjonen