Interesse for forsøk med direkte val av ordførar
Historisk arkiv
Publisert under: Regjeringen Bondevik I
Utgiver: Kommunal- og regionaldepartementet
Pressemelding | Dato: 01.07.1998 | Sist oppdatert: 21.10.2006
Pressemelding
Dato: 1. juli 1998
Interesse for forsøk med direkte val av ordførar
Kommunal- og regionaldepartementet har registrert interesse frå heile landet for å driva forsøk med direkte val av ordførar. Til no har omlag 25 kommunar, politikarar og andre teke kontakt med departementet for å få ytterlegare informasjon om saka. Dei kommunane som ønskjer direkte val av ordførar må søkje departementet om godkjenning etter forsøkslova.
Minka interesse for lokaldemokratiet
- Det trengst ei vitamininnsprøyting for å få opp interessa for lokaldemokratiet og auke valdeltakinga, seier kommunal- og regionalminister Ragnhild Queseth Haarstad. - Ordføraren er kommunen sin representant og ansikt sett utanfrå. Eg trur derfor at valet av ordførar er særleg viktig for innbyggjarane. Det kan auke for interessa for lokaldemokratiet at innbyggjarane opplever at dei faktisk har innverknad på kven som skal representere deira kommune.
- Forsøk som kan styrkje lokaldemokratiet, blant anna med direkte val av ordførar, krev aktive, initiativrike og nytenkjande kommunar, seier kommunal- og regionalministeren. - Vi oppmodar kommunane til å engasjere seg. Vi ser gjerne at dei kommunane som får godkjenning prøver ut ulike modellar mellom anna for ordførarval. På denne måten kan vi hauste fleire erfaringar, få meir kunnskap og betre vurdere effekten av fleire typar forsøk.
Kva må kommunane gjere?
Det er kommunestyret som tek stilling til om kommunen skal søkje om å få drive forsøk. Dei kommunane som vurderer å starte forsøk, må mellom anna ta stilling til følgjande spørsmål: Ønskjer kommunen ein direkte valt ordførar? Kva modell skal brukast? Skal ein direkte valt ordførar ha ein annan myndigheit enn den som følgjer av kommunelova? I praksis er det få grenser. Men forsøk som går på tvers av kommunelova sine hovudprinsipp kan ikkje godkjennast.
Mange førespurnader
Fleire kommunar har vist interesse for forsøksideen. Til no har departementet motteke søknad frå Alvdal kommune i Hedmark. Vi kjenner også til at kommunestyret i Fitjar kommune i Hordaland har vedteke å søkje departementet om forsøk i samband med lokalvalet i 1999.
- Dersom kommunane ønskjer å søkje om forsøk ved valet i 1999, må departementet ha søknaden seinast i månadsskifte september/oktober i år, seier kommunal- og regionalministeren. - Alle søknader som kjem inn vil bli handsama samla i løpet av hausten.
Departementet har utarbeid to informasjonsskriv i samband med direkte val av ordførar. Kommunar som tek kontakt får desse tilsendt.
Oslo, 1. juli 1998
Lagt inn 2. juli 1998 av Statens forvaltningstjeneste, ODIN-redaksjonen