Pressemelding

Nr. 108/1999
Dato: 27.08.1999

Kommunal- og regionaldepartementet kjører valkampanje

Kommunal- og regionaldepartementet starta denne veka ein kampanje for å styrkje kunnskapen hos veljarane om postrøystinga, og for å påverke dei til anten å førehandsrøyste på Posten eller å røyste på valdagen. Kampanjen skal gå både på TV og i radio i tre veker.

Ordninga med postrøystinga er ny for kommunestyre- og fylkestingsvalet, og det har vore naturleg å leggje vekt på informasjon om dette. I tillegg ønskjer departementet å gi motiverande informasjon for å auke valdeltakinga.

I tillegg til radio- og TV-spotar, har departementet utarbeidd plakatar som skal brukast på Posten, på skolar og universitet. Departementet har også utvikla ei eiga valside på Internett som inneheld mange faktaopplysningar om valordninga og ein del linkar til andre aktuelle Internett-sider. Adressa er: www.valg.dep.no.