Pressemelding

Nr. 52/1999
Dato10.05.1999

Kommuneøkonomiproposisjonen 2000 nr. 5

Kommunene får mer til helse og eldre

- Styrking av eldreomsorga

Regjeringa foreslår å auke driftstilskotet til eldreomsorga med 800 millionar kroner. Vidare er ramma for tilskot til sjukeheimar og omsorgsbustader auka frå 3.700 einingar til 5.800 einingar, både for 1999 og 2000.

- Regjeringa følgjer no opp styrkinga av eldreomsorga og den satsinga som pågår i kommunane. Vi foreslår at driftstilskota blir auka med nye 800 millionar kroner i år 2000, seier sosialminister Magnhild Meltveit Kleppa. -- Det vil gjere det mogeleg for kommunane å styrkje eldreomsorga endå meir. Når det gjeld investeringstilskota foreslår vi å auke rammene, slik at vi kan gi tilsegn om bygging av 5.800 bustader og plassar både i år og neste år. No er det opp til kommmunane å innarbeide denne budsjettstyrkinga i sine planar for år 2000 og sjå til at utbygginga av eldreomsorga framleis blir prioritert, seier sosialministeren .

Regjeringa vil i statsbudsjettet for 2000 foreslå å trappe opp driftstilskotet knytt til gjennomføringa av handlingsplanen for eldreomsorga i tråd med måltala og tidsramma som Stortinget har vedteke for handlingsplanen. Løyvinga over kap. 670 post 61 i statsbudsjettet vil bli foreslått auka med 800 millionar kroner. Kommunane blir om kort tid orienterte om kva dette inneber i auka tilskot.

Regjeringa har i revidert nasjonalbudsjett for 1999 foreslått å auke tilsegnsramma for tilskot til bygging av omsorgsbustader og sjukeheimsplassar frå 3.700 til 5.800 einingar under kapittel 586 i Kommunal- og regionaldepartementet sitt budsjett. Det er foreslått å føre denne auken vidare neste år. Det er gjort ut frå søknadsinngangen til Husbanken og ut frå kommunane sine planar for nye sjukeheimar og omsorgsbustader.

- Helsesatsingar

-Helsesatsingane som blei vedtekne av Stortinget i 1998 skal følgjas opp, seier helseminister Dagfinn Høybråten.

I Proposisjonen for kommuneøkonomien varslar ei oppfølgjing av helseplanane for kreft, utstyr og psykiatri. Regjeringa held fast ved dei samla økonomiske rammane og gjennomføringstakten for planane. Løyvingane for år 2000 vil kome i framlegget til statsbudsjett for år 2000.