Rundskriv F-043-98
Historisk arkiv
Publisert under: Regjeringen Bondevik I
Utgjevar: Kirke-, utdannings- og forskningsdepartementet
Vidaregåande opplæring- Om vurderingsforskrifta § 3-10 og om skolereglement (28.05.98)
Rundskriv | Dato: 28.05.1998
Rundskriv F-043-98 |
Saksnr. 98/6264 |
28.05.1998 |
Dette rundskrivet er tillegg nr. 8 til rundskriv F-83-97 |
Fylkeskommunane Statens utdanningskontor Kommunenes Sentralforbund Rådet for fagopplæring i arbeidslivet Opplæringsråda Yrkesopplæringsnemndene Elevorganisasjonane Lærarorganisasjonane Næringslivets Hovedorganisasjon Landsorganisasjonen Handels- og Servicenæringens Hovedorganisasjon Norsk forbund for fjernundervisning Voksenopplæringsforbundet |
Vidaregåande opplæring- Om vurderingsforskrifta § 3-10 og om skolereglement
For å oppnå mest mogleg lik praksis har departementet i dette rundskrivet gjort greie for nokre spørsmål i samband med forskrift 26.06.95 nr. 676 (vurderingsforskrifta) og utarbeiding av skolereglement.
I. Vurderingsforskrifta § 3-10. «Langvarig sjukdom»
Frå fleire hald er departementet bede om å presisere omgrepet «langvarig sjukdom» i § 3-10 tredje ledd i vurderingsforskrifta.
Sjukdom i to veker eller meir er ei rimeleg forståing av omgrepet «langvarig sjukdom». Lengda på sjukdommen må dokumenterast med legeattest.
Skolane bør leggje til rette for at elevar ved eigen innsats kan kompensere for den opplæringa dei taper i samband med langvarig sjukdom, jf. § 3-10 tredje ledd.
Kronisk sjukdom treng ikkje vere samanhengande langvarig for å falle inn under § 3-10 tredje ledd.
II. Fråvær ved religiøse høgtider
Elevar som ikkje høyrer til Den norske kyrkja, har rett til fri i opp til to dagar kvart år i samband med religiøse høgtider etter vedkomande sin religion. Dette følgjer av lov om trudomssamfunn og ymist anna av 13. juni 1969 nr. 25 § 27 a. I tredje ledd framgår det at elevane skal varsle skolen seinast 14 dagar på førehand. Departementet meiner at denne varselgrensa ikkje bør praktiserast strengt.
Ved ønske om fråvær ut over dei to dagane kvart år må elevane søkje om dette i samsvar med reglane i skolereglementet.
Skolane bør leggje til rette for at elevane ved eigen innsats kan kompensere for den opplæringa dei taper i samband med slikt fråvær.
Departementet har no hatt på høyring eit forslag om å endre vurderingsforskrifta, slik at dei to fridagane, som er nemnde i lov om trudomssamfunn og ymist anna, kan reknast med innanfor kvoten på 12 dagar i § 3-10 tredje ledd.
For skoleåret 1997/1998 har departementet fastsett, i medhald av § 9-2 i vurderingsforskrifta, at fri i inntil to dagar i samsvar med lov om trudomssamfunn og ymist anna skal kunne reknast med innanfor kvoten på 12 dagar i § 3-10 tredje ledd i vurderingsforskrifta.
III. Tilrettelegging for sjølvstendig studiearbeid ved fråvær
Departementet vil minne om at skolane i størst mogleg grad bør leggje til rette for sjølvstendig studiearbeid når elevar er fråverande.
IV. Om utarbeiding av skolereglement
Kvar skole skal ha eit skolereglement, sjå lvgo § 15. Dette skal mellom anna innehalde reglar om rettar og plikter for elevane. Departementet minner om at det er skoleutvalet som vedtek skolereglementet, jf. forskrift 18.08.1978 nr. 9134 til lvgo § 27. Det framgår av lvgo § 27 at det skal vere to elevrepresentantar i skoleutvalet.
Skolane bør innimellom vurdere om skolereglementet skal reviderast. Særleg gjeld dette for dei skolane som har skolereglement frå tida før innføringa av Reform 94. Departementet oppmodar skolane til å la elevane ta del i det førebuande arbeidet med å revidere skolereglementet.
Med helsing
Ole Briseid e.f. ekspedisjonssjef |
Tone Loge underdirektør |
Kopi:
Eksamenssekretariatet (SUE)
Alle vidaregåande skolar