Elevaksjon for solidaritet og humanitær hjelp Operasjon dagsverk 1998

"Utdanning for likeverd"

Eg er gjort kjent med at Operasjon Dagsverk i år er lagd til 29. oktober 1998.

I samsvar med landsmøtevedtak i Norges gymnasiastsamband,(NGS), skal midlane i år gå til utdanningsprosjekt for funksjonshemma ungdom i Kenya, Tanzania og Uganda. Norsk Elevorganisasjon (NEO) støttar tiltaket. Midlane som blir samla inn skal kanaliserast gjennom Frelsesarmeen.

I tillegg til sjølve aksjonsdagen blir Operasjon Dagsverk sin informasjonskampanje, "Internasjonal veke", avvikla i perioden 19.-28. oktober. Under "Internasjonal veke" blir det sett søkjelys på norske ungdomar sitt bilete av Afrika, og kva viktig rolle engasjement, solidaritet og menneskerettar har for funksjonshemma. Operasjon Dagsverk har utarbeidd ei eige elevavis med lærarrettleiing, eit yrkesfaghefte og ymse audio-visuelt informasjonsmateriell.

Eg meiner dette elevtiltaket er verdfullt og vil oppmode skulane til å ta del i aksjonen. På denne måten får elevane kunnskap om og innsyn i forholda i andre land, og kan gjennom "Internasjonal veke" og OD-dagen vise solidaritet med ungdom i den tredje verda.

Operasjon Dagsverk er meir enn berre pengar. Det er viktig at aksjonen får eit djupare innhald. Under avviklinga av "Internasjonal veke" vil samarbeidet mellom elevar og lærarar ha stor verdi. Eg viser m.a. til lov om vidaregåande opplæring § 2 siste leddet: "Den videregående opplæringen skal fremme menneskelig likeverd og likestilling, åndsfrihet og toleranse, økologisk forståelse og internasjonalt medansvar", og til formålsparagrafen i lov om grunnskulen §1.

Etter mi meining vil Operasjon Dagsverk kunne gi eit godt grunnlag til å gjennomføre tverrfagleg prosjektarbeid. Operasjon Dagsverk kan såleis sjåast på som ein integrert del av skulen si opplæring. Deltaking på dagen for gjennomføringa av Operasjon Dagsverk skal ikkje reknast som fråver. Eg minner om at arbeid med organisering av Operasjon Dagsverk kan inngå i det arbeidet som tillitsvalde i elevorganisasjonen utøver regionalt og på landsplan.

Eg oppmodar skulane til å syte for at dei elevane som vel ikkje å ta del på sjølve dagen for aksjonen, får opplæring/oppgåver relaterte til nord-sør-spørsmål og likeverdet for dei funksjonshemma.

Eg vil vidare oppmode rektor ved den enkelte skulen om å hjelpe hovudkontoret til arrangøren med å finne fram til ein kontaktperson til kontroll/revisjon av innsamlingsrekneskapen til den enkelte skule.

Med helsing