Pressemelding

Nr. 125/98
Dato: 18. desember 1998

Økonomien i den statlege høgskolesektoren

Kyrkje-, utdannings- og forskingsdepartementet la fredag fram ei stortingsmelding om økonomien i den statlege høgskolesektoren, linkdoc014005-040021#docSt meld nr 26 (1998-99).

Stortingsmeldinga gjer greie for dei viktigaste indikatorane som departementet legg til grunn for å vurdere den økonomiske situasjonen ved dei statlege høgskolane. Meldinga byggjer mellom anna på ei utgreiing om dei statlege høgskolane sin økonomiske situasjon som Kostnadsberekningsutvalet (leia av prof. Arild Hervik) la fram i vår. ( linkdoc006005-020022#docNOU 1998:6 Økonomien i den statlige høgskolesektoren).

Hovudkonklusjonar: Utviklinga i utgift pr student

KUF har nytta indikatoren utgift pr student for å vurdere den økonomiske situasjonen i høgskolesektoren i høve til aktiviteten i sektoren over ein gitt tidsperiode. Utviklinga av denne indikatoren i høgskolesektoren er samanlikna med utviklinga i same indikator i universitetssektoren.

• · I perioden frå 1988 til 1997 er utgift pr student redusert med om lag 4 pst i høgskolesektoren, og redusert med om lag 6 pst i universitetssektoren.
• · I perioden frå 1992 til 1997 er utgift pr student redusert med om lag 1,9 pst i høgskolesektoren og auka med om lag 1,2 pst i universitetssektoren.

Kostnadsdrivande faktorar

I meldinga er det også lagt vekt på å vurdere utviklinga i kostnadsdrivande faktorar som kan ha påverka den økonomiske handlefridomen ved institusjonane. Kostnadsdrivande faktorar er til dømes husleigekostnader, kostnader knytt til kompetanseheving, desentraliserte utdanningar og praksisrettleiing, reisekostnader, administrative kostnader og endringar i handlefridomen på budsjettet.

Departementet har ikkje funne eit godt nok datagrunnlag til å gjennomføre ei konkret talfesting av alle dei kostnadsdrivande faktorane i den aktuelle perioden. Departementet meiner dessutan at ei talfesting av kostnadsdrivande faktorar også vil krevje ei talfesting av faktorar som kan ha medverka til lågare kostnader og effektivisering i høgskolesektoren. Heller ikkje her er det godt nok datagrunnlag til ei konkret talfesting.

Dei vurderingar som er gjort for dei statlege høgskolane samla vil ikkje alltid gjelde dersom ein ser på utviklinga i utgift pr student ved den einskilde institusjon eller den einskilde avdelinga. Departementet har valt å sjå på høgskolesektoren sektoren samla, og ikkje gjort vurderingar for dei einskilde institusjonane.

- Utviklinga i utgift pr student dei siste åra viser ein meir positiv trend i høve til 1997. Ein årsak til dette er mellom anna den planmessige omstillinga som er sett i gang i universitets- og høgskolesektoren med inndraging av studieplassar der budsjettmidlar blir trekt ut over fleire år, seier statsråd Jon Lilletun i ein kommentar.