Pressemelding

Nr. 022-98
27. mars

Stortingsmelding om støttesystemet for spesialundervisning: “Eleven i sentrum”

• Styrking av PP-tenesta i kommunar og fylkeskommunar frå hausten 1999 med inntil 300 nye fagstillingar, ein auke i fagårsverk på om lag 20 %.
• Eit treårig praksisretta kompetanseutviklingsprogram frå år 2000.
• Nedbygging av delar av det statlege kompetansesentersystemet gjennom avgrensing og konsentrasjon av funksjonar og oppgåver.
• Styrking av læremiddelutviklinga, primært gjennom styrking av Nasjonalt læremiddelsenter.
• Særskilte tiltak for samisktalande elevar.
• Forenkling av styringsstrukturen for dei statlege kompetansesentra, med i dag tre styre, til eitt felles nasjonalt styre. Framleis vil det vere eige understyre for hørselssektoren.

Dette går fram av Stortingsmelding nr 23 (1997-98) Om opplæring av barn, unge og vaksne med særskilde behov. Den spesialpedagogiske tiltakskjeda og det statlege støttesystemet, som passerte Statsråd fredag.

-Vi ønskjer å desentralisere delar av det statlege kompetanseapparatet for å styrkje kompetansen der elevane er, seier kyrkje-, utdannings- og forskingsminister Jon Lilletun i ein kommentar til meldinga. Han understrekar at handlingsretta kompetanse trengst på den enkelte skulen og i det spesialpedagogiske støtteapparatet. -Ei samordna kjede av ulike hjelpeinstansar må kvar for seg ha styrke til å gjere dei oppgåvene dei er sette til, med fokus på eleven og på møtet mellom eleven og læraren, legg statsråden til.

Det treårige praksisretta kompetanseutviklingsprogrammet som blir sett i verk frå år 2000, tek sikte på å

• styrkje PP-tenesta sin kompetanse på dei områda lokalsamfunna har størst behov for støtte: åtferdsvanskar, lese- og skrivevanskar og samansette lærevanskar. Senter for åtferdsforsking og Senter for leseforsking blir styrka.
• vri arbeidsprofilen i PP-teneste og statlege kompetansesenter meir i retning av utoverretta rettleiingsarbeid, “systemarbeid”
• styrkje kontakten og nettverkssamarbeidet mellom statlege kompetansesenter og lokal PP-teneste, og kompetansesentra imellom

Dei tiltaka departementet går inn for, inneber:

• Små endringar for synshemma, hørselshemma og elevar med store språk- og talevanskar. For desse vil staten halde oppe tilbodet om lag som i dag, med mindre justeringar/ reduksjonar innanfor syns- og språk-/talesektoren med til saman ca 50 årsverk.
• Heilårs skuletilbod for døve teiknspråkbrukarar blir halde oppe.
• Meir omfattande strukturendringar for kompetansesenter for sosiale og emosjonelle problem:
  • Nasjonal spisskompetanse på området blir samla ved Senter for åtferdsforsking.
  • Styrking av kompetanse på utagerande åtferd ved kompetansesentra for samansette lærevanskar.
  • Styrkt samarbeid med kompetansesenter innanfor barnevernet og barne- og ungdomspsykiatrien.
  • Rogneby kompetansesenter i Oppland vil bli avvikla som kompetansesenter. Barnevernverksemda ved Rogneby kan vidareførast, dersom Oppland fylkeskommune framleis ønskjer å kjøpe desse tenestene.
  • Lillegården kompetansesenter i Telemark vil bli vurdert innlemma i kompetansenettverket for samansette lærevanskar.
• Meir omfattande strukturendringar for dei sju kompetansesentra for samansette lærevanskar, med ei gjennomsnittleg nedbemanning på 40 - 50 %, med til saman 185 årsverk, slik at ressursar og kompetanse kjem nærmare brukarene. Desse sentra får slik ei klårare avgrensing av funksjonar enn i dag, men vil og få nye oppgåver for elevar med sosiale og emosjonelle vanskar. Alle sentra vil få felles oppgåver i høve til store samansette. lærevanskar, mellom desse djup psykisk utviklingshemming og lære- og åtferdsvanskar med nevrologiske årsaker. Einskilde senter vil og få spesielle landsdekkjande funksjonar.
• Sentralt brukerforum blir vidareført.
• Fagleg eining for PP-tenesta blir vidareført.

Dessutan blir det sett i verk enkelte omorganiseringstiltak, m.a. av den statlege syns- og audiopedagogtenesta i fylka. Det særskilde Nord-Noreg-programmet blir avvikla, men institusjonstiltaka blir i det alt vesentlege halde oppe, og tiltak for samiske brukarar blir styrka. Som for landet elles vil PP-tenesta i landsdelen bli styrka.

Dei aktuelle styrkingstiltaka kostar om lag 130 millionar kroner, av dette går 111 millionar kroner til å styrkje PP-tenesta. Dette blir finansiert ved m. a. nedbygging av kompetansesenter innanfor dei eksisterande økonomiske rammene for kompetansesentra for spesialundervisning.

Stortingsmeldinga ligg på ODIN og har denne Internett-adressa:linkdoc014005-040013#dochttp://odin.dep.no/repub/97-98/stmld/23/

Informasjonssjef Kathrine Kjelland, tlf 22 24 74 09, priv. 67 58 32 39 mobil 91398178
Informasjonsrådgiver Jon Aarekol, tlf 22 24 74 17, priv 22 22 44 84