Pressemelding

Kontaktperson:
Ekspedisjonssjef Tore Olsen tlf. 22 24 74 60

Nr.: 011-99
Dato: 24. februar 1999

Forskingsprogrammet ProSus blir vidareført

Kyrkje, utdannings- og forskingsdepartementet går inn for at forskingsprogrammet ProSus blir vidareført. Det skal skje i form av eit strategisk universitets- eller instituttprogram med oppstart frå år 2000.

ProSus (1996-99) er eit forskingsprogram under Noregs forskingsråd som driv målretta forsking og utgreiing, evaluering og formidling for realisering av eit berekraftig samfunn. Aktivitetane har eit kritisk, normativt og framtidsretta sikte. Programmet blei evaluert 1998. Evalueringa og Forskingsrådet si tilråding utgjer grunnlaget for departementet sin konklusjon.

· Departementet ønskjer at særtrekka ved ProSus skal vidareførast, seier statsråd Jon Lilletun. – Samtidig legg departementet vekt på at Evalueringsutvalet sine tilrådingar i hovedsak skal fangast opp. Det gjeld mellom anna tiltak for å styrke kvalitet og kontakt med organisasjonsmiljøa.

Vidareføringa skal, i tråd med evalueringsutvalet si tilråding, skje innan ei ny institusjonell ramme. Det skal opprettast eit strategisk universitets- eller instituttprogram, noko som i praksis inneber at aktiviteten framover skal forankrast i ein forskingsinstitusjon; eit universitet eller forskingsinstitutt.

Finansieringsbehovet bør vurderast nærmare, men skal i utgangspunktet skje innan den ramma ProSus har hatt. Programmet bør opprettast for ein periode på fem-seks år.

Departementet ber om at Forskingsrådet, i samarbeid med ProSus, utarbeider eit forslag til korleis eit slikt strategisk universitets- eller instituttprogram kan innrettast. Så tidleg som mogleg bør ein også kome i dialog med eventuelle vertskapsinstitusjonar. Forslaget skal føreleggast departementet seinast innan 1. juli 1999 med sikte på oppstart fra og med år 2000.