Pressemelding

Nr. 068/1999
Dato: 24. august 1999

Framlegg om betre studentøkonomi:

Inntektsgrensa blir heva for studentar

Regjeringa gjer framlegg om at studentar frå hausten 2000 skal kunne tene 5000 kroner per månad utan at det blir trekk i støtta frå Statens lånekasse. I dag er denne grensa på 3550 kroner i månaden. Dersom inntekta går over denne summen blir 60 prosent av den overskytande inntekta trekt frå støtta frå lånekassen. Inntekt i sommarmånadene blir halde utanfor.

-Å heve inntektsgrensa vil føre til at studentane får betra vilkåra for ekstrafinansiering av studia. Det vil også vere ei viktig endring i høve til Kompetansereforma. Den nye ordninga vil innebere at vaksne får betre høve til å ta etter- og vidareutdanning, seier kyrkje-, utdannings- og forskingsminister Jon Lilletun.