Pressemelding

Nr. 109/1999
Dato: 24. november 1999

Inga overkøyring av statsrådskollega

Medieoppslag onsdag har gitt inntrykk av at statsråd Jon Lilletun har overkøyrt sin statsrådskollega Dagfinn Høybråten i saka som gjeld forskingsprosjekt om ultralyd ved NTNU i Trondheim.

Statsråd Lilletun ønskjer i samband med dette å uttale følgjande:

• Forskinga si frie stilling har ikkje vore truga. Eg har undersøkt påstanden om at helseministeren hadde prøvd å stoppe prosjektet, men har funne at påstanden ikkje var riktig. Dette har eg gjort greie for i brevet til NTNU.
• Eg har ikkje overkøyrt helseministeren, men derimot støtta han.
• Eg seier ikkje ja til prosjektet i Trondheim, men seier derimot at eg deler helseministerens otte for bruken av tidlege ultralydundersøkingar.

Mi meining har derfor vore den motsette av det biletet media har teikna. Både helseministeren og eg har den same forståinga av den frie forskinga si stilling ved universiteta, og vi har derfor korkje tatt initiativ til å stoppe – eller setje i gang – eit forskingsprosjekt. Dette overlet vi til dei organ som har fått slik myndigheit, dvs. forskingsinstitusjonen sjølv og det forskingsetiske komitesystemet. Som forskingsminister må eg få lov til å uttrykkje tillit til at desse organa gjer jobben sin, utan at dette skal bli mistolka.