Pressemelding

Nr.: 043-99
Dato: 21. mai

Universitet og høgskolar får forsøksheimel

Regjeringa gjer framlegg om å innføre ein ny forsøksheimel i lova om universitet og høgskolar. Dette er eitt av fleire endringsframlegg i ein lovproposisjon frå Kyrkje-, utdannings- og forskingsdepartementet som passerte statsråd fredag (Ot prp. Nr. 75 (1998-99)).

Med ein slik heimel vil universitet og høgskolar kunne søkje departementet om dispensasjon frå lova dersom dette er nødvendig for å gjennomføre ulike tidsavgrensa rganisatoriske og pedagogiske forsøk.

- Ein forsøksheimel vil opne for fleksibilitet og betre omstillingsevne hjå universitet og høgskolar, seier kyrkje-, utdannings- og forskingsminister Jon Lilletun. - Dette vil gi høve til å prøve ut nye måtar å styre og organisere institusjonane på og gjere det mogeleg å drive med alternative eksamens- og evalueringsformer.

”SAIH-tiarane”

Regjeringa gjer samstundes framlegg om ein ny heimel i lova om studentsamskipnader som skal kunne gi høve til å krevje inn bidrag til studentbasert internasjonalt hjelpearbeid saman med semesteravgifta (Ot.prp. nr. 74 (1998-99). Bidraget skal vere frivillig, men det er høve til å krevje at alle studentar betalar inn støttebeløpet saman med semesteravgifta, og at refusjonen til studentar som ikkje ønskjer å støtte hjelpearbeidet skjer i ettertid.