Pressemelding

Nr. 96
Dato: 22.12.98

Meir effektiv avfallshandsaming: Forureiningslova skal endrast

Miljøverndepartementet har i dag sendt ut på høyring eit forslag om å endre definisjonane av forbruksavfall og produksjonsavfall i forureiningslova. Etter det nye forslaget skal all næringsverksemd ha ansvar for å handtere sitt eige avfall. Samstundes blir ansvaret og eineretten kommunane har for å samle inn avfall redusert.

- Når avfallsprodusentar får ansvar for sitt eige avfall og større fridom med omsyn til val av innsamlar og handsamingsform, vil det stimulere til å redusere avfallsmengda og auke attvinninga av avfall, seier miljøvernminister Guro Fjellanger.

I dag har kommunane ansvaret for å handtere forbruksavfallet, medan avfallsprodusentane sjølve har ansvaret for produksjonsavfallet. I praksis er grensa mellom dei to omgrepa uklår, og blir tolka ulikt rundt om i landet.

Lovforslaget inneber at kommunane berre får ansvaret for å handsame avfall frå hushalda, medan næringsverksemder, institusjonar og andre som ikkje kan reknast som hushald, får ansvar for sitt eige avfall - kalla næringsavfall.

Departementet ventar at omlag 30 prosent av det avfallet som i dag er omfatta av den tvungne kommunale renovasjonen vil bli utsett for konkurranse mellom ulike innsamlarar som følgje av lovforslaget.

Lovforslaget vil fjerne mykje av den uvissa som har vore rundt grensa mellom dei ulike avfallsgruppene. Med klårare grenser, vil ein sikre at forureiningslova ikkje blir praktisert ulikt rundt om i landet. Ved å opne for konkurranse om handsaming av avfall frå næringsverksemder, vil det stimulerast til avfallsminimering og attvinning der dette er lønsamt.

Høringsinstansane har frist til 21. mars 1999 for å komme med merknader.

Kontaktperson: Avdelingsdirektør Ellen Hambro, telefon 22 24 58 15