Pressemelding

Nr. 93
Dato: 14.12.98

Miljøbyprisen 1998 til Flora kommune

For første gong går heile Miljøverndepartementet sin miljøbypris, på kr 100.000,-, til ein kandidat. Vinnaren er Flora kommune - for engasjement og mangfald i arbeidet med å gjere Florø til ein meir miljøvennleg by. -Miljøtiltaka i Flora er ein viktig vegviser for andre kommunar som vil arbeide med berekraftig utvikling, seier miljøvernminister Guro Fjellanger.

Juryen har m.a. dette å seie om prisvinnaren: «Til grunn for kommunen sitt arbeide ligg ei grunnfest forståing når det gjeld å ta vare på og mobilisere lokale ressursar på brei front». Av konkrete døme på miljøarbeidet i Flora nemner juryen: Lokale tiltak i veksande bydelar. Integrering av miljøvernarbeid og sosialt arbeid, t.d. innan HVPU- reformen og Nærtenesta. Systematisk arbeid innan avfallssektoren. Forvaltning av bygningsressursane i kommunen, slik at kulturtiltaka finst der folk bur og transportbehovet blir redusert. Forvaltning av nære friluftsområde saman med frivillige organisasjonar.

Føremålet med miljøbyprisen er frå Miljøverndepartementet si side å rette merksemda mot byane og miljøvennleg byutvikling. Eit godt miljø i byane har mykje å seie for at folk skal trivast, og dermed også for helse og levekår. Miljøbyprisen skal stimulere til berekraftig innsats og premiere tiltak som kan vere førebilete til inspirasjon for andre.

Den første miljøbyprisen vart i 1996 delt mellom Harstad, Kristiansand og Halden. I 1997 var det Sandnes, Porsgrunn og Skien som fekk dele prisen.

Kontaktperson: Eva Nordvik, tlf.mobil: 90 99 66 72