Pressemelding

Nr. 78/98
Dato: 12.10.98

Sikring av lokal forankring i arbeidet med Naustdal/Gjengedal

Etter samråd med Sogn og Fjordane fylkeskommune har Miljøverndepartementet i dag gitt klårsignal til at det skal utarbeidast ein fylkesdelplan for Naustdal/Gjengedal parallelt med verneplanarbeidet for same område. - På denne måten vil ein kunne sikre ein god folkevald forankring av arbeidet med å sikre dette verdfulle naturområde for ettertida, seier statssekretær Jesper W. Simonsen i Miljøverndepartementet.

Samordna planleggingsprosessar vil bli meir vanleg i verneplanarbeidet i tida framover. Vidare vil kommunar og lokalsamfunn i større omfang enn tidlegare få forvaltningsansvaret for verneområda. - Dette er i samsvar med regjeringa si målsetting om at miljøvernpolitikken i større grad må forankrast i det lokale folkestyret, konkluderer Simonsen.

Naustdal/Gjengedal er eitt av 50 framlegg til store verneområde i landsplanen for nasjonalparkar. Naturvernlova er eit sentralt verkemiddel for gjennomføringa av framlegga i nasjonalparkplanen. Gjennom vedtak etter naturvernlova blir viktige naturområde gitt ein varig status, og det gis heimel for konkrete reguleringar av arealbruken. Fylkesdelplaninstituttet er eit rettleiande planleggingsinstrument utan bindande verknad for arealbruken. Arealbruken kan endrast gjennom rulleringar. Stortinget har forutsett at vernet av Naustdal/Gjengedal skal sikrast med heimel i naturvernlova. Statssekretær Simonsen legg vekt på at ein gjennom arbeidet med ein fylkesdelplan etter plan- og bygningslova betre kan forankre planleggingsprosessen i lokal/regionale folkevalde organ fram mot eit endeleg vernevedtak.

Fylkesdelplanarbeidet skal skje samstundes med at fylkesmannen utarbeider eit framlegg til verneplan etter naturvernlova. -Miljøverndepartementet ser svært positivt på fylkeskommunen sitt ønske om å utarbeide ein fylkesdelplan for Naustdal/Gjengedal. Vi legg til grunn at dei to planprosessane blir samordna mest mogleg og at det blir lagt vekt på eit positivt samarbeid mellom dei to planmyndigheitane i utforminga av plandokumenta, seier Simonsen. Han legg til at han finn det naturleg at framlegg til fylkesdelplan og til verneplan blir sendt ut på lokal/ regional høyring samstundes og helst presentert i eitt samordna dokument.

Verneplanarbeidet har allereie starta opp i regi av fylkesmannen og dei første førebuande, lokale møta er gjennomførte. Det er oppretta ei styringsgruppe med fylkesmannen som leiar og der fylkeskommunen v/fylkesrådmannen og dei fire kommunane er representerte. I følgje denne planen skal fylkesmannen presentere for Direktoratet for naturforvaltning eit framlegg til verneplan sommaren år 2000.

Arbeidet med fylkesdelplan skal ikkje forseinke verneplanarbeidet. Planarbeidet må organiserast slik at planprosessane blir oversiktlege og koordinerte. Kommunane og andre interesser i saka må få høve til å delta på ein god og konstruktiv måte under planlegginga.

Simonsen meiner det er føremålstenleg om dei to planprosessane blir samordna av eit felles koordineringsutval og oppmoder fylkeskommunen til å drøfte ein samordningsmodell med fylkesmannen med utgangspunkt i den arbeidsgruppa som allereie er oppretta for verneplanarbeidet.

Kontaktperson: Jesper W. Simonsen, telefon 22 24 57 03