Pressemelding

Nr. 91/1997
Dato 05.12.1997

Avvikling av einerett i telesektoren:

Nytt regelverk sikrar verksam konkurranse

• Hushaldningar og bedrifter over heile landet skal få eit tilbod om grunnleggjande teletenester av høg kvalitet og til lågast mogleg pris.
• Utbygging og drift av telenett og teletenester skal skje på ein måte som fører til størst mogeleg verdiskaping og effektiv bruk av ressursane i telesektoren.
• Ein verksam konkurranse på telesektoren skal sikre tilgang til det offentlege telenettet og leggje til rette for ein effektiv bruk av offentlege teletenester.

Dette er hovudføremålet med den nye føresegna om offentleg telenett og offentleg teleteneste. Føresegna blei fastsett i statsråd i dag, med heimel i gjeldande telelov. Den nye føresegna gir reglar for den som tilbyr tilgang til offentleg telenett eller leverer teletenester. Reglane tar mellom anna for seg konsesjons- og registreringsordning for tilbydarar og leverandørar og legg til rette for samtrafikk mellom ulike telenett. Det er lagt stor vekt på omsynet til forbrukarane.

Den nye føresegna skal gjelde frå 1. januar neste år, og er ei oppfølging av tidlegare vedtak i Stortinget om å avvikle dei gjenverande delar av eineretten til Telenor. Vedtaket fører til at Telenor frå 1. januar neste år ikkje lenger har einerett til utbygging og drift av sjølve telenettet. Dei vedtatte endringane fører også til at Telenor, frå samme dato, ikkje lenger har einerett til drift av offentleg taletelefoni.

Landsdekkjande tilbod

I tråd med tidlegare handsaming i Stortinget vil det - ved tildeling av konsesjon - bli sikra eit landsdekkjande tilbod av grunnleggjande teletenester til hushaldningar og bedrifter over heile landet.

For Telenor er det lagt opp til å utvide den leveringsplikta som gjeld i dag til også å omfatte tilknytning til digitale nett. Spesielle tenester for funksjonshemma og etablering og drift av telefonautomatar inngår i leveringsplikta.

For tilbydarar som har sterk stilling på telemarknaden skal det vere konsesjonsplikt for tilbod om tilgang til telenett, overføingskapasitet og offentleg telefonteneste. For andre tilbydarar av tilgang til offentleg telenett,overføringskapasitet og offentleg telefonteneste, blir det pålagt ei registreringsplikt.

Gjeldande regelverk gir høve til å innføre ei ordning der nettokostnadene ved leveringsplikta for taletelefoni blir fordelte på aktørane i marknaden. Samferdselsdepartementet skal i løpet av 1998 vurdere om ein treng å ta i bruk ei slik ordning.

Alle teleoperatørar vil bli pålagde å formidle oppringing over nødnummera til politi, brannvesen og helseteneste, utan godtgjersle. Så langt det er teleteknisk mogleg skal operatørane leggje til rette for å kunne identifisere oppringing via nødnummer.

For å motverke ei eventuell utvikling med urimelege regionale prisskilnader gir gjeldande regelverk høve til å innføre maksimalprisar for pålagde landsdekkjande teletenester. Samferdselsdepartementet vil arbeide vidare med å utvikle tenlege verkemiddel for å ta vare på dei samfunnsmessige mål og oppgåver i telesektoren.

Fleire operatørar - "samtrafikk"

Føresegna legg til rette for at alle operatørar skal få samme høve til framføring av teleinfrastruktur, anten ved eiga utbygging eller ved tilgang til eksisterande infrastruktur.

I ein telemarknad med fleire nettoperatørar og leverandørar av teletenester vil det vere nødvendig å sikre samtrafikk mellom ulike nett og tenester. Føresegna legg derfor opp til at einkvar brukar av teletenester skal vere i stand til å kommunisere med einkvar annan brukar og ellers gjere seg nytte av det samla tilbodet av teletenester.

Endringar i teleloven

Regjeringa har i statsråd i dag også lagt fram eit forslag til endringar i teleloven. Endringane er ei tilpassing til den situasjonen som følgjer av tidlegare vedtak i Stortinget om å avvikle gjenverande einerettar for Telenor.