Riksveg 5 Førde - Florø:Utbetring blir framskunda
Historisk arkiv
Publisert under: Regjeringen Bondevik I
Utgiver: Samferdselsdepartementet
Pressemelding | Dato: 12.06.1998 | Sist oppdatert: 21.10.2006
Pressemelding
Nr. 65/98
Dato 120698
Riksveg 5 Førde - Florø:
Utbetring blir framskunda
Regjeringa har i statsråd i dag gjort framlegg om at bompengeselskapet Sunnfjordtunnelen AS skal få løyve til å forskottere inntil 120 millionar kroner til vidare utbetring av riksveg 5 mellom Førde og Florø, i Sogn og Fjordane. Ei slik forskottering fører til at ein framskundar utbetringsarbeid på strekninga mellom Svarthumle og Brandsøy. Beløpet skal betalast tilbake til bompengeselskapet ved statlege løyvingar over budsjettet for riksveginvesteringar, med 40 millionar kroner for kvart av åra 2006, 2007 og 2008.
- Ei utbetring av riksveg 5 på denne strekninga, vil gi dei om lag 10 000 som bur i Flora kommune god tilknyting til stamvegnettet. Delar av vegen er i dag smal og har dårleg standard. Med utbetra veg vil dei to byane Førde og Florø etter kvart kunne utgjere ein arbeidsmarknad. Vegstrekninga mellom Førde og Florø er også viktig for heile Sunnfjordregionen, seier politisk rådgjevar Atle Hamar i Samferdselsdepartementet.
Dei renteutgiftene som bompengeselskapet får i samband med forskotteringa skal etter framlegget frå regjeringa dekkjast ved å krevje inn bompengar i eksisterande bompengestasjon i tilknyting til vegtunnelen Naustdal - Svarthumle på riksveg 5. Denne tunnelen blei opna for trafikk i 1995, og bygginga av tunnelen er finansiert ved hjelp av bompengar.
Det er rekna med at Sogn og Fjordane fylkeskommune i kvart av åra 2002-2005 skal prioritere 55 millionar kroner av venta statlege løyvingar til vidare utbetring av riksveg 5 mellom Førde og Florø.
Utbygginga av riksveg 5 på strekninga Førde - Florø er førebels kostnadsrekna til om lag 340 millionar kroner.
Lagt inn 12. juni 1998 av Statens forvaltningstjeneste, ODIN-redaksjonen