Avtale om statleg kjøp av transporttenester etter 2001
Historisk arkiv
Publisert under: Regjeringen Bondevik I
Utgiver: Samferdselsdepartementet
Pressemelding | Dato: 05.11.1999 | Sist oppdatert: 21.10.2006
Pressemelding
Nr. 126/1999
Dato: 5. november 1999
Hurtigruta: Avtale om statleg kjøp av transporttenester etter 2001
Regjeringa har i statsråd i dag gjort framlegg om at Samferdselsdepartementet kan inngå ein rammeavtale med Hurtigruteselskapa om statleg kjøp av transporttenester på strekninga Bergen – Kirkenes i tida etter 2001.
Den nye avtalen byggjer på at staten skal kjøpe transporttenester frå hurtigruteselskapa for 170 millionar kroner årleg, i ein periode på fem år, frå og med 2002. I avtalen har ein lagt til grunn at Hurtigruta også i tida framover skal ha daglege seglingar, gjennom heile året, på strekninga Bergen – Kirkenes.
I grunngjevinga for framlegget viser regjeringa til ønsket om å oppretthalde den transportstandarden ein i dag har på strekninga Bergen – Kirkenes, også etter at gjeldande avtale mellom staten og hurtigruteselskapa går ut i 2001.
Det blir også vist til at hurtigruteselskapa har opplyst at ein ny avtale om statleg kjøp av transporttenester vil føre til at selskapa kontraherer to nye hurtigruteskip for å erstatte dei to eldste av dei i alt 11 skipa som i dag siglar i Hurtigruta.
Statsråd Lars Sponheim er i denne saka settestatsråd for statsråd Dag Jostein Fjærvoll.
Lagt inn 5. november 1999 av Statens forvaltningsteneste, ODIN-redaksjonen